Pynbna u Eugeneson Lyngdoh ban sdang iaka free football coaching camp ki hep ba rit ha Khliehriat

Syllad | The Rising MeghalayaDecember 16, 2023

Ban sei sap ialehkai ki hep kiba rit ha kaban ialehkai football, u trai ka Rangdajied United FC, Bah Eugeneson Lyngdoh ula pynbna ba u snem ban wan yn pynlong iaka Free Football Coaching Camp ha Khliehriat, East Jaintia Hills District.

Ia kane u Bah Eugene uba dei ruh u player barim ka Ri India bad uba la ialehkai ha bun tylli ki klob ba paw ka ri, ula ong haba wan sakhi iaka final football Super Division ka East Jaintia Hills District Football Association (EJHDFA). Ula ong ia kane ka sienjam la shim ryngkat ka jingiatreilang bad ka Kyrmen Foundation.

Ula pyntip ba kum ka jingsdang kin pdiang shuwa tang 200 ngut ki khynnah jong ka thain East Jaintia Hills District bad kane ka coaching camp kan sdang ha u bnai Kyllalyngkot jong u snem ban wan. Ki heprit kiban ioh jinghikai ha kane ka coaching camp ki dei naduh 5 snem ka rta haduh 15 snem kynthup shynrang bad kynthei.

Shuwa ban sdang ka coaching camp kaba ar sien shitaiew, kan dong shuwa ka jingpyrshang ne ka trial ban jied ia ki knynnah kiba don iaka sap bad ia kane baroh yn pyndep da ki Coach napoh ka Rangdajied United Football School, Shillong.

U Eugeneson Lyngdoh ula ong “ka jingthmu ban pynlong ia kane ka camp ka long ba u angnud ban iohi ba ki khynnah jong ka Jylla ba kin ioh ia kata ka kabu ban mihkhmat na ki Club bapher bapher hapoh ka Ri kumjuh shabar ka ri.”

“Mynta baroh baroh ki kwah ban long kita ki player football, hynrei kumno ba kin iaid ia kata ka lynti, donkam ia ngi ban ngin sara bha iaki naduh ba ki dangrit khnang ba kin long kita ki khynnah kiba kynsai ynda ki la heh la san namar ban shu ong baroh kin long player kata ka bym lah satia ban long,” ong u Eugeneson Lyngdoh bad bynrap ba kane ka sienjam ka ban kin shim kanlong kaba siesoh ba kin lah ban pynmih ia kita ki rang bad thei ialehkai football kynsai.

Ula pynkynmaw ba napoh ka thain Jaintia Hills, ka Jylla ka ioh iaka u Redeem Tlang bad u Halen Nongtdu bad haka Rangdajied United FC ruh ki don haduh 10 ngut ki khynnah napoh ka thain Jaintia Hills.

“Nga iohi ba ka sap ka phong ka don shane bad na ka liang ka jong ngi, ngi don ka jingkyrmen bad ka jingngeit kaba skhem ba kin nangbun shuh shuh ki khynnah kiba kynsai ki ban mih na kane ka thain” la ong shuh shuh u Lyngdoh.

Ula pyntip ba ia kane ka Free Coaching Camp yn pyniaid hi da ka Kyrmen Foundation katba ki Technical Expert ka long napoh ka Ragdajied United FC. Nalorkata ula pyntip ruh ba ka Rangdajied United FC ka don iaka Football School ha Mawlai, Mawngap bad kawei ka Girls Centre hapoh Pine Mount School.

U Bah Lyngdoh ula ai khublei kyrpang ruh iaka Kyrmen Foundation kaba don ka jingkitkhlieh kaba khraw ban plie ka lad ka lynti iaki khun samla bad heprit jong ka dong ka thain lyngba ka sap ka phong kaba ki don.

U kyntu ruh iaki kmie ki kpa jong ki khynnah ba kin shah sngewbha iaki khun jong ki, kiba don ka sap ban wan sha kane Free Coaching Camp khnang kin ioh ka jingmyntoi kaba khraw.