Pynbna u ma Lahkmen naduh u Nailur yn siew tulop noh ka sorkar ïaki nonghikai bad ki nongtrei ka Nongtalang College

Syllad | The Rising MeghalayaAugust 25, 2021

U Myntri ka tnad pule puthi uba long ruh u MLA jong ka Amlarem Constituency haka sngi Balang ula pynbna paidbah ba naduh u bnai 1 tarik Nailur 2021, ki nonghikai bad ki nongtrei jong ka Nongtalang College kin ioh tulop noh naka sorkar lyngba ka Peoples’ Colleges grant-in-aid Scheme.

Ia kane u ma Lahkmen Rymbui ula pynbna haka jingialang kaba lyngkot kaba long ha Nongtalang College bad ula ai ruh iaka sanction letter naka bynta ban siew iaka tulop ki nonghikai bad nongtrei haduh 34 ngut naki 40 ngut ki nonghikai bad nongtrei ka kolej kiba don mynta.

U Ma Lahkmen ula ong ba na ki 9 tylli ki college kiba shah jied kum ki Peoples’ Colleges, 3 tylli ki dei na Rilum Jaintia kaba kynthup iaka Jaintia Eastern College, Khliehriat bad ka Shangpung College nalor ka Nongtalang College.

“Ka sorkar kala shim ia kane ka rai haka 4 tarik u bnai Rymphang 2020 haka cabinet meeting kaba long ha Jowai,” la ong u ma Lahkmen.