Pynbna u Myntri Sports ban siang phlang plastik iaka madan ha Amlarem

Syllad | The Rising MeghalayaDecember 19, 2023

U Myntri ka tnad Sports ka sorkar Jylla u Bah Shakliar Warjri ula pynbna paidbah ba ha u snem thymmai, kata ha u bnai Rymphang (February) yn sdang ban siang phlang plastik noh iaka madan Mini Stadium Ladjaplem, Amlarem.

Ia kane u Myntri ula pynbna haba kren kum u kongsan haka sngi pynlut iaka jingialehkai Super Division Football League ba la pyniaid da ka Amlarem Sub Division Sports Association (ASSA) haka madan Mini Stadium Ladjaplem, Amlarem 19 tarik Nohprah.

Haka jingiakhun phainal ka Seinbhalang Shkentalang ka la ioh ban rah iaka nam lahduh jong kane ka aiom ialehkai hadien ba ka la pynliem iaka Amlarem Social Club da 1-0. Da kane ka namjop ka Seiñbhalang Shkentalang kala buh jaka ialehkai ban ioh ban aireng haka lympung baheh ka Jylla ka Meghalaya State League ka ban wan.