Pyndam iaka jingpynkynriah iaka PWD North Jowai Division ong ka Synjuk Waheh Shnong Jowai

Syllad | The Rising MeghalayaNovember 4, 2020

Ka Synjuk ki Waheh Shnong, Jowai kila pynpaw iaka jingsngewkhia bad pynpaw iaka jingpyrshah kaba jur halor ka jingpynkynriah jong ka sorkar iaka PWD North Jowai Division na Jowai sha Shangpung.

U President ka synjuk ki Waheh Shnong Jowai, u ma Alan Niangti, ula ong hadien baka sorkar Jylla kala pynmih iaka jingpynbna ban kynriah iaka PWD North Jowai Division bad ban pynkylla kyrteng iaka sha Shangpung Division kila rai da kawei ka sur bad dawa na ka sorkar ban pyndam ia kane ka jingkynriah ophis.

“Kane ka jingthmu jong ka sorkar ban pynkynriah iaka PWD North Jowai Division kam don nongrim haei haei bad kadei tang ka jinglehbor jong ka sorkar bad kiba bat iaka bor haka sorkar. Ka jaka trei kane ka ophis ha Jowai kadei kaba biang eh bad ki briew kiba wan donkam ha kane ka ophis ruh kim dei satia tang ki nong Shangpung,” la ong u president ka synjuk waheh shnong.

U Ma Alan ula ong shuh ba “Ka PWD North Jowai Division, ka jingdon jong ka ha Jowai ka pynsuk ia baroh ki nongshong shnong jong ka Rilum Jaintia bad ka Jowai kaba dei ka jaka pdeng kaba don lut ia baroh ki ophis sorkar bad kiba bun hi ki shnong ki iadei kam hi bad kiwei pat ki ophis ha Jowai.”

“Ha kine ki sngi leit ka jingtreikam jong ki ophis bapher bapher la pyndonkam da ka kor ki bor bad ka internet bad lada rah sha Shangpung ia kane ka ophis kan wanrah jingeh shuh shuh haba ha Jowai ruh ka network ka dang thud.

Ka jingthmu ban rah ia kane ka ophis kam dei ka jingthmu ban wanrah iaka jingsuk, hynrei kan wanrah iaka jingeh iaki paidbah bad iaka tnad PWD khamtam haba iadei bad ki kam jong kane ka tnad bad ka ka ophis u DC, ka Treasury bad ki Bank.”

Ka Synjuk kala buh jingkylli ruh kumno kane ka sorkar ka kwah ban rah iaka North Jowai Division bad lada sngewdonkam palat ia kane ka ophis ha Shangpung ruh dei ban kyntiew kyrdan iaka Shangpung Sub-Division bad ban pynmih da kiwei kiwei ki tnad ban iohkam iohjam ki samla kiba la nang la stad.

Ka synjuk waheh shnong kala ther tyngeh bad ong ba “Tang ba don ki mihkhmat kiba don haka sorkar yn rah lut iaki jaka treikam hala ki jong ki shnong khlem da pyrkhat iaka lawei ka Jowai bad lada man pa uwei u nongmihkhmat un rah iaki ophis sha ki shnong lajong ka Jowai kan sah satang kashynrong bad sah ka nam ba dei ka nongbah jong ka District bad la dawa mardor naka sorkar ban pyndam ia kane ka jjingpynkynriah iaka North Jowai Division sha Shangpung.”