Pyndam ka MIDC ia ka jingtyrwa thied jaka ha Umsiang-Mawkdoh ban pynkylla Industrial Estate

Syllad | The Rising MeghalayaApril 17, 2025

Ka Meghalaya Industrial Development Corporation Ltd (MIDC) ha ka 16 tarik Iaiong ka la pynbna ia ka rai ban pyndam noh shisyndon ia ka jingtyrwa ban thied jaka ha Umsiang–Mawkdoh, Ri Bhoi district hadien ka jingmih jong ki jingpyrshah ba dang shen ha kaba iadei bad kane ka jingthmu.

Lyngba u kyrwoh ka MIDC ka pynshai ruh ba ka jingthmu ha lyndet ka jingithuh ia ka jaka ha Umsiang–Mawkdoh ka dei kaba la pynshong nongrim beit halor ka jingbiang jong ka jaka na ka byna ban pynlong kum ka Industrial Estate. Kane ka jaka kaba don markhap bad ka Electronic City ka ban wan jong ka Assam, la iohi kum ka lad ban thaw kum ka Industrial Hub jong kane ka juk ba mynta bad ka ban long kyrpang tang ha kaba iadei bad ki karkhana ki bym pynjaboh ia ka mariang, ki karkhana ki bym pynjot bad pynjulor ia ki sawdong sawkun kiba long katkum ki sienjam jong ka Sorkar Meghalaya ha kaba iadei bad ka mariang. Nalor kata ka jingthmu ka long ruh ban pyndonkam ia kane ka jaka ba kan pynkha ia ki lad aikam iajam ia ki trai shnong bad ban synniang ha ka jingkiew ha ka ioh ka kot ka Jylla.

Ka Corporation ka la pyllait ia ka Expression of Interest (EOI) ha ka 7 tarik Lber 2025 na ka bynta kane ka kam bad ia kane ka jingpynbna la pynmih lyngba ki lad pathai khubor ka Jylla. Hadien kane ki la don hynriew ngut ki briew kiba kwah ban die jaka ki la iashim bynta ha kane ka kam.

Hynrei, ka Corporation naduh ba ka la pynmih ia kane ka jingpynbna ka la ioh pdiang buntylli ki jingpan RTI lyngba ki kynhun seng bapher bapher. Katto katne na kine ki jingpyntip ki la pynpaw ia ki jingkam ba bakla bad kiba ialam bakla ba ka jingiadei iathied jaka ka la dep jia, hynrei ka bym shym la long kaba shisha. Nalor kata ki la don ruh kiba pynphriang ba ka Corporation ka la dep ban pynlut haduh T.100 klur ha kaba iadei bad ka jingthied jaka ka bym shym la long kaba shisha. Ka jingmang tyngka ba la mynjur na ka bynta kane ka sienjam ka long tang hapoh 5% ka pisa na kaei kaba la kam, ong u kyrwoh.

Nalor kata ka MIDC ka la ioh pdiang ruh ia kiba bun ki shithi na ki kynhun bapher bapher ki ba la pynpaw ia ka jingpyrshah ban seng ia ka Industrial Estate ha ka thain, kata ha ryngkat ka jingpyrshah ia kiba kum kine ki kam pynroi. Kumta ka Corporation ka sngew ba kan long kaba bha shibun ban pynsangeh noh ia kane ka jingthied jaka lada kam lah ban pyndonkam ia ka jaka kum ka Industrial Estate.