Pyndam shi syndon iaka projek Umngot Hydro Electric Project: JAC

Syllad | The Rising MeghalayaMay 7, 2021

Ka Joint Action Committee Against Umngot Hydro Electric Project kaba kynthup iaki Elaka Darrang, Raid Lynshing, ki sengbhalang ba kynthup iaka KSU, FKJGP, JSU, TUR bad kynhun pyniaid iaki kam jngoh kai bad kiwei kiwei ki seng nongrep kala dawa na u Myntri Rangbah ka Jylla Conrad K Sangma ban pyndam shisyndon iaka project Umngot Hydro Electric Project.

Ka JAC kala ai da ka dorkhat Myntri Rangbah haka 3 tarik une u bnai ban dawa ban pyndam shi syndon iaka jingthmu ban den iaka Wah Umngot na ka bynta ban pynmih bording.

Ka JAC kala pynpaw ba kane ka projek kan ktah iaki shnong kiba sharum ka Wah Umngot kumjuh kiba shaneng ka Wah Umngot namar ba dei kane ka wah kaba basa ja iaki, khamtam naka kam jngohkai pyrthei.

“Ngin ym pdiang shuh iano iano ban wan kren ne wan pynshai sha ki shnong jong ngi ha kaba iadei bad kane ka project, bad ngi pyntip ruh ban ngin ym shah shuh iano iano na ka liang ka sorkar ne company ban wan jurip ne survey ia kane ka wah na ka bynta ban thmu ban pynmih ia ka bording electric,” ong ka JAC.

Katkum ka dorkhat kaba la phah sha u Myntri Rangbah ka JAC kala ong “Ngi ngeit skhem ba phi la їoh jingtip ruh ba ngi la ai da ki dorkhat ba ngi pyrshah ia ka jingtei bad jingshna ia ka Dam ha ka Wah Umngot, kiba ngi la phah sha ki tnat treikam ba pher ba pher jong ka Sorkar, kaba kynthup ia ka tnat Meghalaya State Pollution Control Board kaba dei ka tnat kaba dei khmih bad pynїaid ia ka jingїalang ujor paidbah (Public Hearing). Ngi kwah ban pyntip shaphi ba ka jingpyrshang jong ka Meghalaya State Pollution Board lang bad ka MeECL ban pynlong ia ka jingїalang ujor paidbah ka long kaba be aiñ bad ka la pynkheiñ ruh ia ki kyndon bad jingpynmih hukum jong ka EIA. Ym tang katta, ngi kwah ruh ban pynpaw da kaba shai kdar hangne ba ma ngi ki nongshong shnong ngim kwah ban їashim bynta ha kino kino ki jingїalang ujor paidbah namar ba ngim kwah satia ba ka Sorkar ne kano kano ka bor ne Company ba kan tei ia ka Dam bad den ia ka wah Umngot,”  

Ki katto katne ki mat baka JAC kaba iathuh kyllum iaki jingma na ka jingtei ia kane ka dam ki long kumne harum:-

1. Ka jingjulor bad jingduh noh ki jaka rep ba seisoh ha shi lynter ka Wah Umngot.
2. Ka jingduh noh ki kam ki jam jngoh kai pyrthei kiba dang iai kiew mynta hadien ki jingpyrshang bad jingtrei shitom da ki phew phew snem.
3. Ki jingma ba ap shrip na ka Pollution, ka jingtwa, ka jingslei um kiba shait long na ki daw jong ka jingden ia ki wah.
4. Ka jingma ba shyrkhei kaba ap ia ngi na kane ka dam khamtam na ka daw ba ka jylla jong ngi ka don ha ka seismic zone 5.
5. Ka jingduh noh ia ki khlaw ki btap, ki siej ki dieng shna iing shna sem, ki mrad bad ki dohkha dohum bapher bapher. Ka jingduh noh ia ki jhur ki soh, ki dawai kynbat kiba long ki lad jingai jingsumar bad jing kamai ha Ri Khasi Jaintia, bad ka jingduh noh jong ki spah mariang.

Ka JAC kala ong shuh shuh ba ka wah Umngot kadei kawei ka ba pawnam ha ka jylla Meghalaya bad kaba la bna nam ruh ha baroh kawei ka thaiñ North East bad India, ym eh tang ba ka bsa ka ai bam ia ngi hynrei ka long ruh ka wah kaba khuid kaba kyntang ha kaba iadei bad ngi ki jait bynriew riewlum. Ka JAC kam kwah satia ban don mano mano ban wan pynjot ne wan pynthut ia ka jinglong khuid jinglong kyntang kane ka wah.  

“Ka Sorkar Jylla ka dei ban pynbna paidbah bad pynmih hukum ba la pynsangeh noh syndon ia baroh ki jingthmu ban tei ia ka Dam pynmih bording elektrik bad ban Den ia ka wah Umngot. Ngim kwah da lei lei ruh ba ha kiwei pat ki snem ne ki por ban wan ba kane ka kam kan khie im biang ban pynkulmar bad pynthut ia ka jingim jong ngi. Kumta ngi kyrpad ha khmat jong phi ba phin buh noh da ka ain ba junom la junom ym bit ban tei dam ha ka wah umngot ne kata ka Moratorium,” ong ka dorkhat ka JAC.