Pyndem tdong ki bor district ba khot jingialang EPH khlem jingbit ka Dorbar Shnong Lumshnong

Syllad | The Rising MeghalayaJanuary 30, 2020

KHLIEHRIAT: Ka jingthmu jong ka Meghalaya State Pollution Control Board (MSPCB) ban pynlong ia ka Environmental Public Hearing (EPH) na bynta ka jingthmu ban tih mawshun da ka Star Cement ha Brishyrnot ha East Jaintia Hills District ka la pulom biang sa shisien na ka daw jong ka jingieng pyrshah jong u Waheh Shnong ka Shnong Lumshnong uba la pyrshah iaka jingpynlong EPH ha Lumshnong khlem da shim jingbit satia ka sorkar na ka Dorbar Shnong.

Mynta ka sngi, shibun ngut ki paidbah ki la pyllait kyrpang ia ka por jong ki ban leit sha Lumshnong ban pynpaw ia ka jingkyrshan jong ki ia ka jingthmu ka Star Cement. Katba ki dkhot jong ka Jaintia Students Movement, Khasi Students Union, ka Stieh bad kiwei kiwei de ki la leit hiar sha katei ka shnong ban pynpaw ia ka jingpyrshah jong ki ia ka jingthmu tih mawshun jong ka Star Cement.

Ka jingthmu jong ka EPH ka long ban ai lad iaki paidbah ban pynpaw iaka jingsngew jong ki haba iadei bad ka jingktah iaka mei mariang bad iaki paidbah.

Ia ka EPH khlem ioh ban sdang haka por kaba la buh namar ba ka la mih ka jingpyni bor hapdeng ki dkhot jong ki sengbhalang bad ki paidbah kiba la halla mar kylliang ba ki kyrshan ne pyrshah ia katei ka projek.

Ka jingpyrshang jong u ADC bad ki heh ka MPSCB ban tem iaki paidbah ka la long lehnohei namar ki paidbah ki khlem sngap satia iaki.

Ki paidbah hapoh ka jingialam jong U Chief Executive Member barim jong ka JHADC u Ma Hambertus Nongtdu, u MLA barim u Ma Simon Siangshai bad u Waheh Shnong jong ka Shnong Brishyrnot ki la halla “Ngi kyrshan iaka Star Cement” bad ki la halla ruh “sengbhalang Go back.”

Hynrei ki nongialam sengbhalang kiba kynthup ia u Leningstar Rymbai u President Rangbah jong ka JSM, u Ohibait Dkhar u President jong ka KSU Jaintia Hills District Unit bad kiwei de lem bad ki dkhot ki khlem randien bad ki la ieng ba pynpaw ia ka jingpyrshah jong ki ia katei ka jingthmu tih mawshun jong ka Star Cement.

Hadien katto katne kynta, la lah ban pynlong iaka jingialang bad ha mar ba sdang ka jingialang la kiew syndet u Assistant Waheh Shnong jong ka Shnong Lumshnong u C Rymbai ula pynpaw iaka jingbitar jong u iaki bor pyniaid district bad ki heh jong ka MSPCB kiba la khot pynlong ia katei ka jingialang EPH ha Lumshnong khlem da pan jingbit satia na ka Dorbar Shnong.

Ula dawa ban dei ban pynduh pyndam shi syndon ia katei ka jingialang EPH khnang ban lait ban mih na kino kino ki jinghuri hura. Kumta da jingbanse ki bor pyniaid district bad ki heh MPSCB ki la pynwai noh ia katei ka jingialang bad mih noh shi syndon na katei ka jaka.

U President rangbah jong ka JSM  ula ong ba ka jingpyrshah jong ki ia katei ka jingthmu tih mawshun ka long halor ka nongrim ka par tih mawshun ka iajan bha bad ka eco sensitive zone jong ka Narpuh Wildlife Sanctuary.

U la iathuh ba ka Ministry of Forest, Environment & Climate Change lyngba ka office memorandum No. F.22-43/2018-IA.III tarik 8 bnai August 2019 haba pyntreikam ia ka rai jong ka Supreme Court ka la mana pyrshah iaka jingtih marpoh khyndew hapoh u pud u sam jong ka Eco Sensitive Zone ne shi kilomter na u pud u sam jong ka National Park bad Sanctuary.

Shuh shuh u la ong ba kino kino ki projek hapoh shiphew kilometer na u pud u sam jong ki National Park bad Sanctuary dei ban ioh iaka jingmynjur na ka Standing Committee of the National Board for Wildlife.

Ka MSPCB ka la khot pynlong ia ka EPH kaba nyngkong na bynta katei ka jingthmu jong ka Star Cement ha ka 19th tarik u bnai Risaw, mynshem snem ha Brishyrnot ka la pulom noh na ka daw ka jingpyrshah jong ki Hynriew Shnong bad ki sengbhalang kiba kynthup iaka Jaintia Students Movement, ka Khasi Students Union bad kiwei kiwei de.

Ka Star Cement ka thmu ban tih mawshun ha ka jaka kaba heh 42 hectares bad ka jingkhein kyllum ba tih mawshun ha ka shisnem ka long 2.507 metric tonnes. Ka jingjngai jong ka jaka tih mawshun na ka Narpuh Wildlife Sanctuary ka long 1.46 kilometres katba 1.38 kilometer na ka Wah Lukha.