Pyndep iaka jingknia Aitnar poi ki diengkhlam ha Iawmusiang

Syllad | The Rising MeghalayaJuly 7, 2023

Ka jingkyrpad kyrpon ki nongsharai niam ka Raij Jowai hapoh ka jingpyniaid u Dolloi Elaka Jowai, u Ma Puramon Kynjing kala long kaba seisoh bad ka mariang ruh kala ailad iaki khun Niamtre jong ka Seiñraij Jowai ban iashimbynta shitrhem haka sngi ba Ar jong ka Behdieñkhlam haka sngi Thohdieng.

Haka sngi ba ar jong ka Behdieñkhlam, U Dolloi Elaka Jowai, u Ma Puramon Kynjing ula pyndep iaka Knia Aitnar ne ka jinglehniam ha pung kyntang naduh ka por 5 baje mynstep hajrong ka hukum niam bad ki phra dong ne Kmai Raij ba ym pat bit ban leit rah iaki dieng khlam na khlaw kat ba ym pat lah ban pyndep iaka jingknia Aitnar.

Dei hadien balap pyndep iaka jingknia, ki Kmai Raij, kata Loompyrdi Iongpiah, Loomiongkjam, Panaliar, Dulong, Tpeppale bad Loomkyrwiang kila iakyduhlang ha madan Mynkoi Pyrdi, Iongpiah.

Ki Kmai Raij kila mih lang baroh shisyndon bad pynhiar iaka bom ka bhuri ha Biar ka Blai. Hadien nangne kila mih sha Iawmusiang ban leit rah iala ki jong ki dieng khlam na khlaw na Riatturiem.

Haka por nohphai sngi baroh ki Kmai Raij kila wanrah la la ki jong ki diengkhlam ha Iawmusiang. La shai ka sngi kin rah biang ia kine ki dieng khlam bad pynieng hala ki jong ki shnong.

Ki kynthei ruh naduh ki khynnah haduh ki longkmie ha ki khor ki khriam kiba itynnad kiba ki phong kila mih sha Iawmusiang bad ban ai khublei Behdieñkhlam mar kylliang.

Ka Khonraij ne ka dong Chilliangraij kala wanrah ia ka Khnong Blai bad la buh haka jaka buh ha Loom Soo Iung.

Na kaliang President Seinraij Jowai U Ma OR Shallam ula khot ula wer sngewbha ia baroh ban iashimbynta bad lehkmen lang bad ka Seinraij Jowai ha kane ka Behdieñkhlam ban pyni sha ka pyrthei iaka jingriewspah ka riti ak dustur jong ki Pnar.