Pyndep ka Dorbar Niam Seiñraij Jowai ïaka nguh ka dem pyneh rngiew ban ïaid beit ka Behdieñkhlam

Syllad | The Rising MeghalayaJune 25, 2021

Ka Dorbar Niam ki khun ka Seiñraij Jowai da ka jingsngewkhia ïaka jingwan lyngsher ka khlam COVID-19 mynta ka step 25 trarik u Jylliew kala pynlong iaka nguh ka dem pynehrngiew ban lah ban pyniaid beit pyniaid ryntih ka Shad Niam Behdieñkhlam ha Jowai.

Ia kane ka nguh ka dem pynehrngiew la pyndep ha ïing ka Langdoh ha Loomiongkjam, Jowai katkum ka nongrim ngeit niam ba la ioh pateng hapoh ka jingialam Dolloi ma Puramon Kynjing

Ki nongialam jong ki dong ki shnong kiba iadonbynta ki kynthup iaki nongialam jong ka Seinraij Jowai, Seinraij Ummulong, Seinraij Shillong bad Seintylli Niamtre Ladthadlaboh.

La ioh ka jingkren lyngkot na u Raymond Nartiang, Pator Raij Jowai, kyntien pdiang burom na u Samboon Siangbood, Langdoh Raij Jwai bad kyrpang ki kyntien ai mynsien ia ki nongialam ha kum kane ka por jong ka jingtynjuh kat shaba phai ba la pashat da u Puramon Kynjin, Dolloi Elaka Jowai.

Shuh shuh u Dolloi u la shim ruh ban pynsngew pynsngap hapdeng ki nongialam jong ki dong ki shnong, ki Seinraij shaphang ka jingiaidlynti jong ka Dorbar Niam ha ka ban pynkhreh na ka bynta ka bit ka biang bad iaidbeit iairyntih ki kam ba iadei bad ka Shad Niam Behdeinkhlam mynta u snem bad ruh u da khot kyrpad ia ki nongialam baroh ba kin shimkhia ban iatreilang ha kum kane ka por da kawei ka sur kawei ka thong kat kum ba la bthah khnang ba ka jingpyndep ia ki kam niam ba iaid ryngkat bad ka Shad ka kmen ha kine ki sngi jong ka Shad Niam behdeinkhlam kin long kiba iaidbeit iaidryntih ryngkat ka Tipbriew-Tipblei.

Kum ban pynehrngiew ia ka longrynieng manrynieng jong ki nongialam ba shim ban kit ia ka lyngkor kum ki nongsynshar na ka bynta ka bit ka biang jong ki nongshongshnong ha kum kane ka por jong ka jingtynjuh u khniang jingpang Covi-19, ka Dorbar Niam hapoh ka jinglamkhmat u Dolloi ka la pynlong ruh ia ka nguh ka dem, ka duwai ka phirat ryngkat ka suit ka shor bad u khaw eh rngiew.

U Dolloi hadien ba la pyndep ia ka ngooh ka dem, ka duwai ka phirat kat kum ka rukom dustur u hynneiwtrep hynniewskum u la aiti pat ia u khaw ehrngiew ba la thep hapoh ka tyndong siej sha baroh ki nongialam, ki Kñi jong ki Phra Kur bad ruh ki riew rangbah kiba iadonbynta ha ka ban pyntyllun ia ki kam jong ka Shad Niam Behdieñnkhlam.