Pyndep ka Hima Khyrim iaka pomblang Ïewduh

Syllad | The Rising MeghalayaNovember 12, 2024

Ka lehniam leh rukom kaba shi sien shi snem ka Hima Khyrim, khamtam lei lei haba iadei bad ka nguh Blei Dem Blei ka jong ka, la lah ban pyndep shwa ia kawei ka bynta kaba nyngkong, bad katta hi ka long ka jingpyndep ia ka Pomblang Iewduh, ia kaba la lah ban pyndep ha ka 11 tarik Naiwieng 2024, ha lum Pomblang.

Hangne ki dak ki shin jong ka jingpdiang U Blei Trai Kynrad ryngkat u Lei Shyllong ka kren shai kdar ba u blang u la dkut bad hap ka khlieh ha madan tang marsien a pom ia u da u Duhalia Rangbah, kane ka long ka khubor na ka sngi jong ka jinglehniam ia ka Pomblang Iewduh, kaba juh pyndep man la ka snem da ka Hima Khyrim kaba don hapdeng ka jingpynkhreh ban pynep ia ka lehniam bad ka shad ka jong ka shi sien ha ka shi snem.

Haba iakrn bad Pa’iem Dr Balajied Sing Syiem, Syiem ka Hima khyrim, u pynpaw ba kat kum ka jingngeit barabor ba shi sien pam dei ban dkut kaba mut ba ka khuid ka suba ka jingpynkhreh, ka jingpyndep kam, ka synshar ka khadar bad ka bha ka miat jong ki khun ki hajar.

Nalor katta u Pa’iem u la iathuh  ba kane ka lehniam ka dei ruh ka bynta jong ka ainguh aidem ha u Lei Shylong uba long u Ryngkew u Basa uba seng ia ka long hima long sima, ba long u kpa ka iawbei ka Pasyntiew bad kane ka ainguh ai dem ka long naka bynta ka bha ka miat ka long syiem man syiem, kiba khraw batri baroh bad naka bynta ki khun ki hajar bad ka bha k mat ka jong ki.

Katba na ka liang u Duhalia Rangbah u bah Skhembor Khongjirem u kam ba kam dei satia ka bynta kab suk ia u ban shu leit pom ne mutdur ba u bang un dkut, pynba u kam ba kane ka dei ka sap ba kyrpang ba u Blei, u Lei  Shyllong bad ka Hima Khyrim kaba bynshet ha u ban pom ia u blang u da skhem ka mynsiem ryngkat ki nongbat blang kiba ia sngewthuh jingmut lang bad ha kum kane ka por ba katta ka jingeit ba ka hima kan suk kan biang u pom ia u blang bad ka ryngdang ka jong u ka da dkut .

Ia kane ka kam u bah Skhembor u la bat ia ka, mynta  kumba 13 snem kum u Rangbah Duhalia bad ban pyndep ruh haduh 13 sien ia ka jingpom ia u blang.

Ha kawei pat ka bynta jong kane ka lehniam ka dei ka ia ki sawdong ki sawkun jong kane ka jaka, kaba mynnor ka long tang kum uwei u lum, kaba pynban da ka jingiarap jong ka sorkar jylla lyngba ka tnat Tourism, mynta ka la kup da kawei pat ka dur kaba tymmai, ha kaba la don ki jaka kaba ki paidbah ki la ioh ban da shong ban peit suk mynsiem ia ka jingpyndep ia kane ka jinglehniam.

Haba ia iakren bad Dr Balajied Sing Syiem,  I la pynpaw ba ha ki sngi ki snem kiba la leit noh mynba ym pat ioh jingiarap na ka sorkar  khamtam ka tnat  tourism  la shem bad iohi I ka jingkhap ngiah bad khim jong ka jaka.

Pynban u pa’iem u la ong ba ha kine ki ar snem haba la ioh ia ka jingiarap na ka liang ka sorkar ka la mang ia ka jingiarap   na ka sorkar, ha kaba la lah ban shna bad ban tei ia ki jaka ban ioh shong ki paidbah, ki duhalia, kiba khraw batri baroh, ka la pynitynnad bad ba la don ruh ki jaka ba rung bad ban ia mih, kaba  kane ka jingtei ka lah ban kham pynrung ne ka la ngiam khambun ki paidbah ne ki khun ki hajar ban wan ban sakhi ia kane ka lehniam kaba shisien ha ka shi nem.

Kumta na ka liang Pa’iem um lah ban khlem da ai khublei iaka sorkar bad Kyrmen ba kan dan iai bateng ba kan don ryngkat bad ka hima naka bynta ki jingdonkam kiba na awei ka por sha kawei pat.