Pyndep ka Raij Jowai ia ka lehniam Knia Khang

Syllad | The Rising MeghalayaJune 20, 2019

JOWAI: Ka jinglehniam Knia Khang kadei kawei na ki jingknia ainguh  aidem ba shisien shisnem da ka Raij ka Shnong ia ki Soo Dwar-Soo Luti badKa Tawiar Takan kiba long ki lei Shnong lei Raij kiba la wan da ka hkum Blei naduh kulong kumah ban long ki nongda nongker ia ka shnong ka Raij na ki sih ki roi jong ka pyrthei, mariang kiba wan ha ki dur ki rukom bapher bapher.

Shwa ban poi kane ka sngi Knia Khang kiwei ki jinglehniam ba hap ban pyndep da u Doloi, u Langdoh, U Pator, Ki Sangot, ki Wasan bad ki Kñi na ki Phra Kur Phra Kmai ki long ka Dihsoopen ha iing Langdoh bad ka Kbai Mooknor hakhmat ka ïew ka syiem hakhmat ki nongshongïew shong hat bad ki nongwanïew wan hat.

Ia kane ka leh niam la pyndep mynta ka sngi 20 tarik Jylliew bad ka jingmut jongka ka long ban  ainguh ai dem na ka bynta kiei kiei ki jingkyrkhu kiba ka shnong ka raij ka laioh da ka jingiada jong ki Lei shnong-Lei Raij kiba long u Mookhai, Mooralong, Moosniang, Mootong bad ka Tawiar takan (wah Myntdu).

U Doloi ka Elaka Jwai waheh Puramon Kynjin ha ba ai kyntien ha kajingiadei bad kane ka leh niam hadien ba la dep ka jing leh niam, u pynpaw ka jingsngewnguh bakhraw ia baroh ki khun ka shnong ka raij, ki nongshongïew shonghat hapoh ka Raij Jwai kiba la nohsynniang da ka mynsiem jong ka jingsngew burom bad ïaieit para nongshongshnong naka bynta ka jingthmu babha jong kane ka jingpyndep niam kyrpang ia ki Lei shnong- Lei Raij kiba da ka jingiada jongki miet la bad sngi ka shnong ka thaw ka laioh ia ka shongsuk shongsain, ka immiat imbha bad ka roi ka par.