Pyndep ka Raij Jowai iaka Knia Pyrthat

Syllad | The Rising MeghalayaJune 28, 2020

Ka raij Jowai hapoh ka jingkhmih u Dolloi ka Elaka Jowai, Puramon Kynjing uba dei u khlieh ka niam rukom kila pyndep iaka niam Kñia Pyrthat haka step Sngi U Blei bad kane ka jinglehniam ka long kaba iaid beit iaid ryntih katkum ka rukom.

Kane ka lehniam Kñia Pyrthat ka dei ka rukom ba hap ban pyndep shwa ban poi ki saw sngi lai miet ka Behdienkhlam hapoh ka raij Jowai. Ki waheh na ka Raij Chyrmang, Raij Tuber, Raij Ialong kila wan ban iuhkjat ha u lum Mookhai ban pyndep ia ka lehniam Kñia Pyrthat.

Kane ka jingleh niam kalong ban ainguh aidem shisien shisnem ia u Syiem Pyrthat bad ia u Mon Ryngklaw bad ruh kaba la hap ban leh ne pyndep shitaiew shwa ban poi ki sngi ki ia jong ka shad Ñiam Behdeinkhlam hapoh ka Raij ka Shnong.

Iaka lehniam kyrpang mynta ka step la pyndep hajan u Lum Mookhai da u Sangot Paswet, u Sangot Pakyntein bad u Sangot Pasubon haka jingiadonlang u Dolloi, u pator, u langdoh bad ki basan.

Hadien ba la pyndep iaka lehniam hajan u Lum Mookhai, iaka bynta kaba bud la pyndep ha madan bam knia pyrthat ha kaba u Langdoh Chyrmang ula wanrah iaka ka sla, u Langdoh Tuber da ka pyrnah pyrjin katba u Langdoh ka Raij Ialong da u khaw ban pyndonkam haba ai ai nguh ia u Syiem pyrthat.

Khatduh hadien ba la pyndep ia la ka jong ka bhah ka bynta ia kaba tam la song na ka bynta ban bhah lang iaki ‘Lai Langdoh’ ba kynthup ia u Langdoh Chyrmang, Langdoh Tuber bad u Langdoh Ialong.