Pyndep ka Raij Jowai iaka lehniam Thoh Langdoh, kitbok u Dolloi ban ioh iaka Behdieñkhlam ba phuh phieng

Syllad | The Rising MeghalayaMarch 20, 2022

Ka Raij Jowai hapoh ka jinglam khmat u Dolloi Puramon Kynjing kum u khlieh ka niam khlieh ka Elaka haka 19 tarik une u bnai dang step phyrngap ryngkat ki wasan bad ki kni na man ki longïing jong ki khun ka niamtre ki la ïamih na ïing Langdoh ban leit pyndep ïaka lehniam Thoh Langdoh ban ainguh ai dem ha ka Duwan Kñia ba don ha Law Kyntang Law Langdoh jong ka Raij Jowai.

Katkum ka jingngeit ba ha kane ka sngi Thoh Langdoh, hapoh ka Raij Jowai ki khun ka niamtre kim ju bit ban leh kino kino ki kam kiba long pyrshah ïa ka adong niam adong blei, kata ka mut la adong pyrshah ba kim bit ban trei ban ktah da kaba pynkha, pynmong ne pynsniewdur ïa ka mariang namar ba kane ka sngi ka long kawei na ki sngi ban pyni hakhmat ka pyrthei ïa ka jinglong kordor bad kheiñ kor kheiñ burom ïa ki jingkyrkhu ba ka mariang ka ai ïa u khun bynriew.

U Dolloi Puramon Kynjing haba batai shaphang kane ka sngi, u ong ba ka jingdon ki Law kyntang Law Langdoh ka long ka jingkyrkhu bakhraw ïa u khun bynriew ha kaba ki diengheh diengsan ki mih ki plung ban ai ïa ka um bad sei ïa ka lyer pynngad kiba long ka jingmyntoi bakhraw ïa ka shnong ka raij kumta ban sumar bad pynneh pynsah ïa ka jinglong kyrpang jinglong kyntang jong ki ka long kaba donkam na ki por sha ki por bad kyrpang ruh ha kum kane ka sngi Thoh Langdoh, kaba long ka sngi ba la dep adong ba ymbit ban leh kino kino ki kam ki ba long pyrshah ïa ka adong niam adong blei.

Shuh shuh u Dolloi ula kitbok kitrwiang ruh ïa ki khun ka Raij ka shnong bad Elaka ba da ka jinglah ban pyndep ïa kane ka lehniam Kñia ainguh aidem, ki khun ka raij ka shnong bad elaka kin ïoh ïa ka pyrthei mariang ba bit ba biang ha baroh ki liang bad ruh u khmih lynti ba ki khun ka Raij ka shnong baroh kin ïoh ban ïashim bynta ha ka Shad Niam Behdieñkhlam mynta u snem ha ryngkat ka jinghun jingsuk mynsiem bad ka jingiphuh iphieng.

Kum ban shu ppynkynmaw ba ka Dorbar Ki Soo Langdoh ba kynthup ia u Kongwasan Langdoh Chyrmang, Langdoh Jowai, Langdoh Tuber bad Langdoh Ialong kila dep pynbna iaki tarik Shad Niam Behdieñkhlam jong u snem 2022.

Ka Behdieñkhlam haka Raij Chyrmang kanlong haka 1 tarik Jymmang, ha Raij Jowai ha u bnai Naitung (July) 14 tarik, ka Raij Tuber haka 22 tarik u Naitung (July) bad ka Raij Ialong 7 tarik u Nailar (August).