Pyndep ka Raij Jwai iaka knia ainguh ia ki Soodwar Sooluti bad ka tawiar takan

Soolangki LalooJune 14, 2020

Ka lehniam knia khang kadei kawei na ki jingknia ainguh ba shisien shisnem ka Raij Jwai ia ki Blei Shnong Blei Raij kiba la tip da kawei ka kyntien kum ki Soodwar Sooluti bad ka Tawiar Takan,  mynta u snem ia kane ka lehniam la pyndep mynta ka sngi 14 tarik June hapoh ka jingpeit jingpyniaid u Doloi, u Pator, u Langdoh, ki Sangot ryngkat ki Wasan.

Kane ka lehniam kniakhang ka long kum shibynta ban pyndep ia ki hukum adong u Trekirot shwa ban poi ki sngi ki taiew jong ka Shad Niam Behdeinkhlam bad shwa ban poi kane ka sngi ki shakri niam ka raij naduh u Dolloi, u Pator, u Langdoh, ki Sangot ryngkat bad ki Wasan ki la pyndep ruh ia ka lehniam Dihsoopen bad ka Kbai Mooknor.

Ha Kane ka jingleh niam mynta u snem ka Raij Jwai ka la ialeh ban pyndep da kaba bud ryntih ruh ia ki hukum ka Sorkar kum ha kaba kiar na ka jingpynbun paid bad ialeh ruh ban don ha ka jingiajngai katkum ba la bthah da ka tnat treikam jong ka koit ka khiah.

Haba iakren bad u Dolloi waheh Puramon Kynjing u la iathuh ba ka jinglehniam ha kane ka sngi ka long kaba iaidbeit iaidryntih ryngkat ki dak ki shin jong ka jinglehniam ki long kiba hun Blei bad u da pynpaw ruh ka jingsngewnguh ia baroh ki nongshongiew shonghat bad ki paidbah kiba la synniang sha ka khrong ka tri bad kiba la iatreilang ha ka ban pyniaidbeit iaidryntih bad pyndep ia ka jinglehniam na ka bynta ka burom u Trekirot bad ki Blei Shnong Blei Raij.