Pyndep ka raij Mukhla iaka nguh blei Synhen

Syllad | The Rising MeghalayaJuly 24, 2021

Ka Seiñraij Mukhla haka sngi Saitjaiñ hapoh ka jingialam u Langdoh Niam ka Raij Mukhla u Ma Wanbha Lyngdoh ha ryngkat ki Waheh Sankur bad u General Secretary/President ka Seiñraij Mukhla ki la pynlong ia ka nguh ka dem ha ka duwan knia ne duwan leh niam ia ka blei Synhen ha ka pung Thadlaskeiñ  kaba don hapoh ka Shnong Mukhla.

U Langdoh Niam ha ryngkat ki Waheh Sankur bad ki paidbah kila nguh la dem ia ka blei ba kan da kan ker ia ki khun ki roit jong ka Seiñraij Mukhla ba kin ioh ia ka met ka phad kaba shait ba khlain bad kumjuh ruh ban beh sha jngai ia kane ka khlam COVID 19 kaba la sar ha satlak ka pyrthei.

Kane ka jingle niam ha Pung Tahdlaskeiñ la ju pynlong ha ryngkat ka knia ka khriam ka Shad Pastieh shad wait kum ka dak ban ai nguh ia ka blei Synhen. Kane ka jinglehniam kala sangeh la bun bun snem, hyrnei tad haduh u snem 2010 hapoh ka jingialam u Daloi Elaka Nangbah Rgh, R.M Garod bad ryngkat ka jingialam u Langdoh Niam ka Raij Mukhla bad u Langdoh Niam ka Raij Nangbah la lah ban pynkhia im biang ia kane ka jinglehniam knia bad shad pastieh ia ka pung Tahdlaskeiñ.

Kane ka jingle niam la pynlong ruh ha u snem 2015, hynrei ha kane kynti namar ka jingwan lynsher ka khlam ka Seiñraij Mukhla kam pat lah ban pyndep ia kane ka jingleh niam.