Pyndep ka Raij Mynso iaka lehniam Chad Tyllu

Syllad | The Rising MeghalayaApril 4, 2022

Ki khun Niamtre ka Raij Mynso mynta ka sngi ki la pyndep ïaka lehniam Chad Tyllu kaba long ha madan Dieñtyllu, Mynso A, West Jaiñtia Hills.

Ïa kane ka lehniam la juh pyndep man la u snem hashwa ban hiar rep sha ki hali pynthor ban thung ban bet ïa u symbai u kba.

Kane ka lehniam ka la sdang hynnin ka janmiet da ka jingshad ‘Synyaw’ na Lum Lariang ryngkat ka put ka tem.

La wan ban sakhi ia kane ka jinglehniam da u ma Comingone Ymbon MLA ka thaiñ kum u kongsan bad u Evening Teron MDC ka thaiñ kum u symbood kongsan

U Comingone Ymbon haba kren ha kane ka jinglehniam ula pynpaw ka jingkyrmen ba u Trai kynrad un ïada ïaka shnong ka thaw na ka khlam ka ngoh bad wanrah ka jingbha jingmiat hapoh ka shnong ka thaw.

Ula kyntu ïaki nongïalalam ka Seiñraij ban nang pynphuh pynphieng shuh shuh ïaka lehniam haki sngi ki snem ban wan.

U la ong ruh ba iaka Khnap Thang-bru ka Raij yn pyndep noh haki 5-6 bnai bad ula pynbna ban ai jingïarap sa T. 5 lak ban pynbha pynmiat ïaka Khnap.

Hashwa kane la ïoh ki kyntien pdiang burom na u W. Shylla, ka nguh blei na u Kynmoo Situng bad ki jingkren lyngkot na ki dolloi ba kynthup u Dolloi ka Elaka Mynso u Karmi Myrchiang, u Dolloi ka Elaka Shangpung u Chanki Langbang, u Dolloi ka Elaka Jowai u Puramon Kynjing kumjuh na u Secretary ka Seiñraij Mynso u Pynhumi Chen, Kamni Challam bad kiwei kiwei. Ia ka jingialang la pynïaid da u H War president ka Seiñraij Mynso.