Pyndep ka Raij Raliang iaka lehniam Kopati Puja

Syllad | The Rising MeghalayaNovember 29, 2020

Ka lehniam Kopati Puja ka dei kawei na ki lehniam ba la pyndep shisein shisnem hapoh ka Raij Raliang hadien ba la dep ka samoi ot bad wanrah ia u khaw u kba sha la ki iing ki sem jong ki khun ka raij Raliang kala poi sha kaba kut haka 28 tarik une u bnai.

Mynta u snem ia kane ka jinglehniam la sdang naduh ka 25 tarik Naiwieng bad la pynkut haka 28 tarik Naiwieng.

Kumba julong ka rukom ia kane ka jinglehniam la pynlong shuwa iaka jingknia ainguh ha Law Kyntang da u Wamon bad hadien nangta bud pat sa ka jingshad Pastieh ba la shimbynta da u Wamon, u Doloi, ki Langdoh, ki rangbah Kur bad kiwei kiwei ki shakri niam ka raij ha ryngkat ka jingud jong ki ksing ki dhah.

Ha ka por mynsngi pat ka jinglehniam ba bud kadei ka jingleit buh ia u Syntiew Puja da u Wamon sha ka wah Umiurem ha kaba la synranlang da ki khun samla bad katto katne ki shakri niam ka raij bad ha ka por janmiet pat ka ladon ka jingshad Pastieh Niam ha iing u Wamon hapdeng ka jingwan sakhilang ki khun ka Raij ryngkat ki riam ki beit ba iphuh iphieng.

U Doloi ka Elaka Raliang Rangbah Chawas Lyngdoh haba iakren ha ka jingiadei bad kane ka lehniam Kopati Puja, u la ong ba phai na kawei ka liang u dap da ka jingsngewkhia  namar ki khun ka raij kim ioh shuh ban iashimbynta kumba ju long ha ki snem ba la leit hynrei wat la katta ruh u khmih lynti ba da ka jinglah jong ka Raij ban pyndep ia kane ka lehniam Kopati Puja ka jingkyrkhu kan long ia baroh ki khun ka Raij, ka Elaka, ka ri bad ka jaitbynriew.

Ula ong ruh ba ia kane ka lehniam la pyndep katkum ka dustur ba hikai uba rim ban ainguh aidem ia U Trai nongbuh nongthaw bad ki ryngkew ki basa na ka bynta ki jingkyrkhu ba la ioh hapoh ka shnong ka raij.