Pyndep ka Seinraij Jowai ïaka Kñia Pyrthat

Syllad | The Rising MeghalayaJuly 4, 2022

Ki khun ka Ñiamtre hapoh ka Raij Jowai haka sngi Nyngkong haka jinglam khmat u Dolloi Ma Puramon Kynjing kum u khlieh ka ñiam khlieh ka Elaka ryngkat u Pator, ki Soo Langdoh bad ki Wasan waheh jong ki Sooraij Soo Langdoh ki la pyndep ïaka lehniam Kñia Pyrthat bad ïa u Mon Ryngklaw kaba la pynlong ha Duwan Kñia ba don ha u Loomkyndong.

Ka Langdoh shwa ban Kñia ka la siang ïaka nguh ka dem ban pynsngew sha ki blei ki syiem na bynta ban ïaid beit ïaid ryntih ki kam niam bad ban suk ban saiñ ka shnong ka raij.

Hadien kane la pynbud pat ïaka jingpeit jingbishar ïaki lai tylli ki ‘Tpu niam’ ba la shet da ka Langdoh.

Kane kadei ka lehniam ba hap ban pyndep shi taïew shwa ban poi ka sngi jong ka Shad Ñiam Behdieñkhlam hapoh ka Raij Jowai bad ka nongrim jong ka, ka long ban ainguh bad burom ïaki jingkyrkhu ba la ïoh bad ban kyrpad kyrpon ban nangïoh shuh shuh ki Soo Langdoh Soo Raij ïaka imsuk im saiñ, imbha im miat bad ban lait na kiba bun ki rukom tynjuh jong ka pyrthei mariang.

U Waheh Puramon Kynjin, Dolloi ka Elaka Jowai, haba kren ïaki kyntien ba ïadei bad ka jingpynkhreh pynkhrum ïaka Behdeiñkhlam bad ïaka lehniam ne Kñia ainguh bapher, ula ong ka long kaba sngewtynnad ba ha une u snem la ïoh ïaka pyrthei mariang kaba miat ba bha bad ki khun ka raij kin ïoh ban ïadonbynta haka jingpyndep ïaka mon u Trekirot haki Soo-Sngi Le Ìaw.

Shuh shuh ula ong katkum ki prokram jong ka lehniam bapher na bynta ka burom u Trekirot, ki Blei ki Syiem ki long kiba miat ba bha, u kyrmen bad khmih lynti ba ka Behdeiñkhlam jong une u snem kan long kaba phuh ba phieng ryngkat ka jingkyrkhu kyrdoh ha ki liang baroh.