Pyndep ka Seinraij Jowai iaka lehniam Kñia Khang ban pynkhreh iaka Behdienkhlam

Syllad | The Rising MeghalayaJune 16, 2023

Kumba ki sngi ki taiew jong ka Shad Niam Behdienkhlam hapoh ka Raij Jowai ki la jan poi kumta ki Shakri niam ka Raij naduh u Dolloi, Pator, Langdoh, Sangot, ki Wasan ryngkat ki Kñi jong ki kur ba iadon bynta ha ki kam niam ki la iabunkam ha ka ban pyndep ia ki jinglehñiam ne knia ainguh bapher kiba long kat kum ki adong niam ba ladep buh ryntih naduh basdang ka Raij ka Shnong.

Haka sngi Palei, ka shakri niam ka Seinraij Jowai, kila pyndep kawei na ki jinglehniam kaba la tip kum ka Knia Khang, kaba long ka jingknia ainguh aidem ia ki Blei Shnong Blei Raij kiba ieng ban ker ban da ia ka shnong ka raij na ka sniew ka smeh, ka tyrut ka smer kiba wan ha ki rukom bapher.

Mynta u snem hapdeng ka jingjur u slap haman ki phang ka jingpyndep ia kane ka jingknia ainguh da ki Shakri niam ka Raij ka long kaba iaibeit iaidryntih bad shongkun shongblei, bad da ka jinglah ban pyndep ia kane ka jingknia ainguh ba shisien shisnem shwa ban poi ki sngi ki ia jong ka Shad Niam Behdeinkhlam ka shnong ka raij kan nangioh ia ka shongsuk shongsain, ka manbha manmiat ryngkat ka roi ka par ha baroh ki liang.