Pyndep ka Seiñraij Mukhla iaka jingai nguh ‘Blei Synhen’ ha Pung Thadlaskeiñ

Syllad | The Rising MeghalayaJuly 24, 2020

Ka Seiñraij Mukhla hapoh ka jingialam u Langdoh Niam ka Raij Mukhla u Rgh. Wanbha Lyngdoh ha ryngkat ki Waheh Sankur bad u General Secretary bad President ka Seiñraij Mukhla mynta ka sngi ki la pynlong ia ka Nguh Blei ka dem Blei ha ka duwan knia ne duwan leh Niam ia ka “Blei Synhen” ha ka pung Thadlaskeiñ, Mukhla, West Jaintia Hills District.

Ka Seiñraij Mukhla kala pynlong ia ka Nguh Blei ka dem Blei ha ka duwan knia ne duwan leh Niam ia ka “Blei Synhen” ha ka pung Thadlaskeiñ  bad ha kane ka nguh ka dem Blei u Langdoh Niam ha ryngkat ki Waheh Sankur bad ki paidbah kila nguh la dem ia ka Blei ba kan da kan ker ia ki khun ki roit jong ka Seiñ Raij Mukhla ba kin ioh ia ka met ka phad kaba shait ba khlain bad kumjuh ruh ban beh sha jngai ia kane ka kjut khlam COVID 19 kaba la sar lut ia baroh kiri jong ka pyrthei.

Ki nongialam Niam hapoh ka Seinraij Mukhla ki pynlong ia kane ka jing ai nguh ia ki Blei ki Syiem kiba don sawdong hapoh u pud u sam ka Seiñraij Mukhla bad khamtam ia ka “Blei Synhen” kaba long ka Blei kaba ri bad sumar ia ki khun ka Seiñ Raij Mukhla na kipor sha kipor. Hadien jong ka jingai nguh la pynkhuid ia ka Duwan Knia bad ki sawdong saw kun jong ka Thadlaskein.

Ia kane ka leh niam la pynlong ruh ia ka mynshem snem ha kane hi ha ka juh ka jaka bad u bnai.

Kum ban shu iathuh ba ia kane ka lehniam ha Pung Tahdlaskeiñ la pynlong ia ka knia ka khriam ka Shad Pastieh shad wait kum ka dak ban ai nguh ia ka “Blei Synhen”. Kane ka lehniam kala duh kala dam da ki phew phew snem mynshwa, hynrei dei tad ha u snem 2010 hapoh ka jingialam u Pa Daloi Elaka Nangbah Rgh, R.M Garod bad ryngkat ka jingialam u Langdoh Niam ka Raij Mukhla bad u Langdoh Niam ka Raij Nangbah ngi la lah ban pynkhie im biang ia kane ka jing lehniam knia bad shad pastieh ia ka pung Thadlaskeiñ.

Ha u snem 2015 da ka juh hi ka sur bad ka jingia sngewthuh jingmut lang la lah ban pyndep biang ia kane ka jingleh Niam ia ka pung Thadlaskeiñ, hynrei ia mynta ka kynti pat ka Seiñraij Mukhla ha ryngkat bad u Pa Daloi Elaka Nangbah kam shym la pynlong ia kane ka jingleh niam, hynrei la shu pynkhuid iaka duwan bad ka ai nguh iaka ‘Blei Synhen’

Ka Raij Mukhla khmih lynti ba kan ioh biang ban pyndep ia kane ka jingleh Niam ha ki snem ban dang wan da ka jing iatrei lang kini ki Ar Raij ha ryngkat bad u Pa Daloi ka Elaka.

Ia kane ka jingleh niam uno uno u ba ioh ban long u Daloi ka Elaka Nangbah u hap ban pyndep shisien ha ka shi jingim jong u.

Ka Seiñ Raij Mukhla kaba dang hap hapoh ka Elaka Nangbah ka pynpaw ka jingsngew sarong ba hakane ka por ba long Daloi da u Rgh, RM Garod kum u Pa Daloi ka Elaka Nangbah ka la lah ban pyndep la Ar sien iaka jingleh Niam bad ki khmih lynti ruh ba kin sa ioh ban pyndep biang ia kane ka jingleh sa ha ka sien kaba lai.

U Rgh, S. Sari uba long uwei na kine ki Waheh Sankur u ban a ka Kur Sari, ula ong ba kane ka nguh ka dem Blei u Langdoh Niam ha ryngkat ki Waheh Sankur bad ki paidbah kila nguh la dem ia ka Blei ba kan da kan ker ia ki khun ki roit jong ka Seiñ Raij Mukhla ba kin ioh ia ka met ka phad kaba shait ba khlain bad kumjuh ruh ban beh sha jngai ia kane ka kjut khlam COVID 19 kaba la sar lut ia baroh kiri jong ka pyrthei.