Pyndep ka Seiñraij Mukhla ïaka lehniam knia Syiem Khlam bad u Ram Shyllong

Syllad | The Rising MeghalayaMarch 30, 2021

Ka Seiñriij Mukhla kala pyndep ïaka jingleh niam knia ïa ka Syiem Khlam bad u Ram Shyllong kiba long ki Blei kiba ker bada bad ri bad sumar ia ki khun ki raiot ka Seiñraij Mukhla haka sngi Nyngkong.

Kane ka jingleh niam knia ka dei kaba ju pyndep man la u snem ha u bnai Lber (March) shi sien shi snem ha shuwa ban thung ban bet ïa u symbai u phniang haki jaka rep.

“Ka jingmut jong kane ka lehniam knia khlam ka long ba ngi ki khun ka Seiñraij Mukhla ngi ai nguh ia ka Syiem Klam bad u Ram Shyllong kiba la ri lada ia ngi ba ngin lait na ka pang ka shitom ka khlam ka ngoh ka iap ka sa hapoh ka Seiñraij Mukhla. Ïa kane ka jingleh niam la sdang ia ka naduh ka por 6:00 Am ha ïing Blei (iung Langdoh) hapoh ka jingialam u Pa Langdoh Niam bad ryngkat ki Waheh Sankur ki ba long ki nongbud jong u Langdoh Niam. Ha ka por 7:00 Am ngi la mih na ing Langdoh ban leit Knia hapoh Duwan Knia ha khlaw kyntang jong ka Seiñraij Mukhla,” la ong u Standbyme Sari, u Waheh San Kur na ka Kur Sari.

“Haka por step katba ka bri Langdoh bad u Pa Langdoh bad ryngkat ki Waheh Sankur ki dang ia bunkam ban pynkhreh ia ki tiar knia, ki khun ki hajar ka Seiñraij Mukhla ki ia pynkhreh ban oh shrong oh shrup ia u siej ban rah sha ïing Blei ban beh ia ka khlam ka shitom sha ki jaka ba jngai napoh ka Raij ka Muluk bad ka Shnong ka thaw, ia kane ka jingleh niam knia la pyndep ia ka da u maji niam ka Seiñraij Mukhla uba na ka kur Sari, bad ia ki tiar Knia la pyndon kam da u syiar shynrang bad u sniang shynrang,” la ong u ma Standbyme.