Pyndep ka Seinraij Mynso iaka lehniam Behdeinkhlam, da u masi ai burom iaki blei

Syllad | The Rising MeghalayaSeptember 16, 2024

Ka Seinraij Mynso haka 16 tarik Nailur kala pynkut noh iaka lehniam Behdeinkhlam (Behkymphui) ba shisien shisnem shuwa ban ot bad lum ia u symbai sha u thiar hapdeng ka jingiphuh iphieng kaba la shimbynta da ki khun ka raij haka jingshad bad ka jingrah lang iaki dieng ‘Kymphui’ ia kiba la ot pynwan dur bad pynitynnad bha.

Ha une u snem kane ka lehniam Behdeinkhlam hapoh ka Raij Mynso kala sdang naduh 11 tarik Nailur da ki jinglehniam bapher bapher bala pyndep da u Lyngdoh ryngkat u Chutia.

Mynta ka kynti ka Raij Mynso kala knia da u masi ban ai nguh aidem iaki blei ban da ker iaka Elaka naka khlam ka ngoh bad ka pang ka shitom. Kane ka jingknia da u masi kala long hadien ba lai aiom bala knia da u sniang.

Hashwa ka jinglehniam kala don ka jingialang lyngkot haka jingdonlang u MDC JHADC Ma Eveningstar Teron kum u kongsan, u Dolloi ka Elaka Jowai Ma Puramon Kynjing, u Dolloi Elaka Mynso Ma Karmi Myrchiang nalor kiwei kiwei.

Iaka lehniam Behdeinkhlam hapoh ka Seinraij Mynso la pynwandur iaka da ki rong ki rup kum ki ‘Deiñkymphui’ ba la wanrah da ki khun ka Niamtre na man la ki thliew iing.

Ka lehniam Behdeinkhlam kadei kawei na ki lehniam ban ainguh aidem ia u Blei Trai kynrad ban long bha ka rep ka riang bad ban dap u khaw u kba bad ha kajuh ka por ban beh krad iaka khlam ka ngoh bad ki jingsniew hapoh ka imlang sahlang.

Haka sngi pynkut iaka suit ka shor kaba la pynmlien naduh ki longshwa mynshwa la pyndep da u Lyngdoh ha iing Lyngdoh haka jingdonlang u pator, ki riew rangbah ka Raij kumjuh ka jingsynran lang ki khun ki hajar naduh ki khynnah rit haduh kiba la san.

Hadien ba la pyndep iaka suit ka shor ha iing Lyngdoh, ki khun ka Raij ki la ia mih paidbah kynthei bad shynrang ryngkat ka jingriew ka ksing ka bom bad ka jingrah lang ia u dieng Kymphui kumjuh u Masi haduh ban da poi ha madan Myrneiñ ban pyndep iaka Kñia Syiemkhlam Syiemdait ba la pyndep da u Chutia.

Shuwa kane haba poi haka Nan Ñiaw Wyrnai ki nongialam niam bad ki khun ka niamtre kila shim bynta ban sum ban sleh da ka jingngeit ban kin sait khuid ialade ban ioh iaka met ka phad kaba koit kaba khiah.

Kane ka nan dei kaba la shna haka dur ka tyllong umbam umdih bad la shna bha iaka da ka dewbilat bad la tapmoh iaka da u knup, kaba don ka khanatang ha ki por u barim bajah.