Pyndep ka Seinraij Mynso iaka niam Behkymphui ban ioh ia u soh u kba ba bha

Syllad | The Rising MeghalayaSeptember 22, 2020

Ka Seinraij Mynso kala pyndep iaka lehniam Behkymphui, ka lehniam kaba la pynlong manla u snem shuwa ban ot ia u soh u kba bad ban lum sha ka thiar.

Mynta u snem ka Seinraij Mynso wat hapdeng ka jingsar ka khlam COVID-19 haka jylla, kala lah ban pyndep ia kane ka lehniam Behkymphui kaba la sdang naduh ka 17 tarik haduh 21 tarik une u bnai Nailur (September) 2020.

U Dalloi ka Elaka Mynso ma Karmi Myrchiang ula iathuh ba mynta u snem kila knia da u masi ban aiburom iaki blei ki syiem ban pyllait iaka elaka na ka jingsniew ka imlang ka sahlang bad ka khlam. “Kane ka jinglehniam ka dei ak rukom kiba ngi la bud iaki jinghikai uba barim shuwa ban ot bad ban lum ia u symbai shaka thiar. Lai aiom ngi knia da ki sniang bad haka sien kaba saw ngi knia da ka masi bad mynta ka snem ka dei ka pali kaba saw,” la ong u Dalloi.

Mynta u snem kaba bun ka bynta jong ka lehniam la pyndep da ka suit ka shor bad ka nguh ka dem kaba la pyndep da u chutia, langdoh bad kiwei ki riew niam.

Kham hashuwa ladon ka jingialang ha kaba la wan iadonlang u Dalloi Elaka Jowai u ma Puramon Kynjing uba la long kum u kongsan, u Dalloi Elaka Raliang uba long kum u symbud kongsan ha ka jingiadonlang u dalloi ka Elaka Mynso nalor ki riew ngeit ka Niamtre ka shnong Mynso ban pynneh pynsah iaka niam tynrai bad ban bud iaki jinghikai uba rim.

Hadien pat bud s aka suit ka shor ha iing u Langdoh bad la pynbud sha ka shad Behkymphui bad haba la poi haka Nan Ñiaw Wyrnai ki nongialam niam bad ki khun ka niamtre kila shim bynta ban sum ban sleh da ka jingngeit ban kin sait khuid ialade ban ioh iaka met ka phad kaba koit kaba khiah.

Kane ka nan dei akba la shna haka dur ka tyllong umbam umdih bad la shna bha iaka da ka dewbilat bad la tapmoh iaka da u knup, kaba don ka khanatang ha ki por u barim bajah.

Ryngkat rangbah shynrang bad kynthei bad ki samla kila mih na kane ka jaka da kaba shongshit ban leit rah iaka masi haka duwan ban knia iaka masi bad ban ainguh iaki blei ki syiem ban beh sha jangai iaka khlam ba kin ioh ot ia u symbai ba bha ba miat bad ban roi kyrhai.