Pyndep ka Seng Khasi iaka nguh ka dem  shi hat shi taiew shwa ka Kiew Pyneh Rngiew sha Lum Sohpetbneng

Syllad | The Rising MeghalayaJanuary 30, 2022

Ka Lum Sohpetbneng Committee ryngkat ka Komiti u Tymmen U San ka Seng Khasi Kmie, mynta ka sngi, ki la lah ha kaban pyndep ia ka nguh Blei ka Dem Blei ha Lum Dorbar ka Lawnongthroh, ha ka Mei Mawbuh bad kumjuh ha u Lum Sohpetbneng, kaba long kum shi bynta jong ka Shi Hat Shi Taiew ka jingpynkhreh ia ka Kiew Pyneh Rngiew kaba sh sien shi snem, shau lum ba kyntang ka jaidbynriew u Sohpetbneng, kaba la buh ban long ha ka 6 tarik u Rymphang 2022.

Ka jingpyndep ia ka lehniam ka leh rukom, la sdang naduh na khyrdop, kaba long mar pyrshah jong ka Pung Umiam bad nangne la leit shwa ha kaban pynlong ia ka nguh ka dem, ka khan ka bishar, kaba hangne katba u u Riew Tymmen Riew San, u dang sei ia ki kyntien ksiar kyntien rupa ban khot ban pyrta ia ki ryngkew ki basa, kiba la sngew bad sngap, da ka jingwan ban paw ka jong ki.

U Chairman ka Komiti u Tymmen U San ka Seng Khasi Kmie u Rgh Skor Jala ryngkat ka jingiasynran lang u vice chairman u Rgh Donbokstar Kurkalang bad Secretary Rgh Pyndap Nongrum,  ki  iathuh ba shwa ban rung sha ka lehniam ka leh rukom, kim shim la shu iaid madei mata, pynban ki da pynlong shwa ia ka nguh ka dem ka khnong ka bishar halor jong ka  ramew .

Nangne la pynlong ia ka jingpyndep ia ka lehniam ha Lum Dorbar, Lawnongthroh, hangne ruh la pynlong ia ka shat ka khein bad  da ka jingieit Blei la theh ka dak jingkyrkhu ha kaba la wan kein ki ryngkew ki basa.

Ynda haba la biang nadong shadong na Lumdorbar, la dei pat ka khep ban kiew sha ka Mei Mawbuh, ha kaba la pyndep ia ka lehniam da kawei ka ïar bah ïar san bad uwei u rang binong rang bishot u rang kyniu rang phawar, kum ka dak jong ka jingpyndep iaka nguh ka dem ia ka ‘lei shnong lei muluk,  ki pa shnong pa muluk ryngkat ki ryngkew ki basa ba kin ker ba kin da, ha kaba ka kam hangne ruh ka long kaba biang ba bit ba iaid beit ba iaid ryntih.

Hadien kane, ki riew tymmen riew san ki la pyndep ruh pat ia ka pynsum pynsleh ia ka ‘Mei Mawbuh’kaba dei ka nongsad ka nongkhyllong, ka nongkha iar kha long ia u khun bynriew.

Na ka Mei Mawbuh, la kiew pat sha kliar u Lum Sohpetbneng,  kaba hangne la pyndep ia ka nguh ka dem ka shat ka khein ka bishar hakhmat u ‘Mawkhan u Mawblei’ uba long u nongsynran u nongpeit nongjngoh bad ynda haba la biang ka nia ka jutang ba la shai ki dak ki shin kumba ia pan lyngba ka lengbah ka lengsan, ba u Tymmen u San, joit u kiew pat halor ka duwan ka dupat u Sohpetbneng, ban pynlong ia ka ainguh aidem, hadien ba ka kam ka jam naduh kaba sdang ki la biang lut nadong shadong.

Haba la dep kine ki kam ki jam baroh, la khmih lynti, ba ha ka 6 tarik u Rymphang 2022, kaba dei ka sngi jong ka kiew pyneh rngiew, kan long kaba iaid beit ba iaid ryntih bad kaba jop.

Hadien kane la ioh ruh ban iakren bad u Chairman bad Vice Chairman Lum Sohpetbneng Committee ka Seng Khasi Kmie Rgh I. Sun bad Rgh Paia B Synrem, ki pynpaw ba kat kum ka jingioh jingbit na ki bor synshar bad bthah ruh da ka Seng Khasi Kmie, ka Kiew Pyneh Rngiew mynta u snem kan long  tang khyndiat ngut bad kiba lah ban wan ban ia sakhi  ruh kan long tang kito kiba la ioh ia ka entry pass bad kumta, la kyrmen ba ki parakur parakha kin ia trei lang bad ka seng  haba iadei bad kane ka jingpynbeit.

“Kat kum ka jingbthah ka Seng Khasi Kmie, yn pynbiang ia ki ‘entry pass’kaban yn sa sam sha baroh ki jylli jong ka Seng Khasi ba don ha kylleng ka Bri Hynñiewtrep Hynñiewskum bad kumjuh sha ka Seiñ Raij, da kumta ka komiti ka kyrmen ba kane ka jingpynkhreh kan long kaba jop wat la ka long kaba rit ruh hynrei kan long kaba iaid beit ba iaid ryntih” la pynpaw kine ki arngut ki rangbah nongialam .

Shuh shuh, kine ki arngut, ki sngew ruh ban pynpaw ba da kane  nguh ka dem,ki kyrmen ba ka khlam ka ngoh kaba wan ban lyngshop mynta, kan duh kan dam noh  ha kane ka ri bad kumjuh ha snieh jong ka sla pyrthei, khang ban ia bit ia biang, katno tam lei lei ba ki khynnah ki khyllung ne ki samla ba kin ioh ban ia leit sha la ka pule ka dangle ka jong ki bad khmih lynti ba une u snem uba thymmai, un dei uba bit ba biang ba pahuh pahai ba dap kyrhai tang ka kyrkhu Blei najrong ia tbian ia baroh lang.

Ki nongialam ki shim ia kane ka kabu ban pynpaw ruh ia ka jingsngew nguh ia ka Mei Syiem jong ka Raid Mawbuh kaba la ai ia u khaw eh u khaw shan, ba la lah ban pyndonkam ban pyndep ia ka nguh ka dem, naduh Lum Dorbar Lawnongthroh, ha ka Mei Mawbuh bad ruh ban ioh ban pyndep ia ka nguh kadem  shi hat shi taiew  shwa ka kiew pyneh rngiew sha u Sohpetbneng.

Ha kane ka sngi, na ka liang u Rgh Don Kupar Dkhar, President Seng Khasi Kmie, u la kyntiew ruh ia ka lama jong ka Seng Khasi, kabalong kum ka dak ka jingpynkhreh ia ka ‘kiew pyneh rngiew’ ban long ha ka Robibar kaban wan.