Pyndep ka Seng Khasi Kmie ïa ka Kiew Pyneh Rngiew sha U Lum Sohpetbneng

Syllad | The Rising MeghalayaFebruary 7, 2021

Ka Kiew Pyneh Rngiew ba shisien shi snem ka Seng Khasi Kmie, ba la pynïaid lyngba ka Lum Sohpetbneng Committee bad ka Komiti U Tymmen U San la lah ban pyndep noh ïa ka mynta ka sngi ha u lum kyntang u Sohpetbneng. La wan ban sakhi da ki khmat nongïalam ki Jylli bad ki Tnat ka Seng Khasi bad nongïalam ka Seiñraij.

Kumba juh long, shwa ban sdang ka jingkiew sha u lum kyntang Sohpetbneng, ka Komiti u Tymmen U San ryngkat ka Lum Sohpetbneng Committee, ki la pynlong shwa ïa ka nguh ka dem, ha khyrdop ba don mar pyrshah bad ka pung Umiam,  kaba long kum ka dak ba sa shisien, ban da pynsngew ban da pynsngap ha U Blei Trai Kynrad, ha U Ryngkew Ki Basa, ba kat kum ba la dep ban ïa pan na ka shi hat ka shi taiew, ba ka sngi ka la poi naka bynta ban ïaid ïa ka lynti ban kiew sha kliar u lum kyntang u Sohpetbneng ban pyndep ïa ka nguh Blei ka Dem Blei.

Ka Kiew Pyneh Rngiew, ka dei ka bynta ka lehniam ka leh rukom u paid Hynñiewtrep Hynñiewskum bad Hynñiaw Wasa, kaba kren shai kdar ïa  ka mynsiem jingïadei kaba ïajan hapdeng u khun bynriew bad la U Blei Trai Kynrad Nongbuh Nongthaw, kaba kum u khun bynriew, markhmat u kiew halor ka duwan ka dupat, ba un nguh un dem ha  U Blei, ba un bteng ban theh sei ïa katta ka kyrkhu ka kyrdoh, ban ai ïa ka shait ka nang ka khiah krat khiah stang, ban roi parum pareh ha ka trei ka ktah, ka kamai kajih, ban bha ka kam ka duk, ban nang nang ïar ka shembuit ka shembor ryngkat ban nang khraw ka nongrim tynrai jingeit jong ka Tip Briew ka Tip Blei, ban ieit ïalade ban burom ïa kiwei bad ban ïai neh skhem ha ka nongrim ban kamai ïa ka hok.

Ïa ka nguh ka dem la pyndep ïa ka da u Rgh Skor Jala, Chairman ka Komiti U Tymmen U San, ula sei ïa ka nia ka jutang hok tynrai bad katba u Rgh Skor Jala u dang dem dang puson bha ha ka pynleit niam pynleit rukom, u ryngkew u basa u la poi tiap ba un wan ban dem hapneh jong u, ka dak kaba kren shai, ba ka lehniam lehrukom, kadei kaba la hun la suk bad pdiang hun mynsiem  da ki Blei, kat kum ka jingïapan na myn nyngkong ki sngi ka Shi Hat Ka Shi Taiew.

Shwa  ban ïoh ïa ka nguh ka dem, la ïoh  ïa ka jingkren na u President Seng Khasi Kmie, u Rgh Don Kupar Dkhar, u pynpaw ïa ka jingsngew bynñiaw namar bym lah ban ïa wer lut ïa la  parakur ki parakha baroh, namar ka jingwan ban lyngshop jong ka khlam ka ngoh, kaba la wan ban ban mynta la jan dap artad shi snem. Kumta na ka daw jong ki jingmana jong ki bor sorkar, la hap ban pyrkhing ïa ka jingwan ban kiew pyneh rngiew mynta ka kynti hapoh une u lum ba kyntang, ha kaba nyngkong ka jingïoh jingbit na ka ophis jong Deputy Commissioner Ri-Bhoi District ha kaba nyngkong la shah ban ïa don tang kumba shispah ngut, kane ka la buh jingeh ïa ka Seng, kumno yn lah ban pyndep ïa kane ka kam, wat la katta ruh long katba ka long, ïa ka niam hi ym dei ieh jyndat .

Hynrei u Rgh Don Kupar u la ong ba U Blei um shim la ieh noh, u ïai sngap na ka por sha ka por ïa ka jingdwai bad dei tad ha ka 2 tarik mynta u bnai Rymphang, ba ka sorkar jylla, sa shisien kala pynjynsur ïa ki adong adit ki jong ka, ha kaba ka hukom ka ong ba la shah 75% na ka shispah ban kiew sha une u lum kyntang u Sohpetbneng.

Marsien mih kane ka hukum ba thymmai, u Rgh Don Kupar u la ong ba mar mar la thoh biang da kawei ka shithi sha ka ophis jong DC Ri-Bhoi bad ha nohphai sngi jong ka 4 tarik, la shah ne ailad pat ïa kane ka kam ban ïaid beit noh shakhmat kat kum ka hukum ne jingai jingbit ba thymmai jong ka sorkar jylla kaba la ailad pat sa shisien ban lah ban pynïaid shakhmat ïa kne ka kam kaba mynta ka sngi.

Hadien kane, la ïoh ruh ïa ka jingkren na u Rgh I. Sun, Chairman Lum Sohpetbeng Committee, Seng Khasi Kmie, ban ai ïa ka kyntien maitphang jong kane ka kiew pyneng rngiew  ba jun pynlong shisien ha ka shi snem.

Ki nongïalam ba pawkhmat ba la sakhi lang ïa kane ka sngi ka kynthup ïa u Acting Syiem ka Hima Mylliem Pa’iem Ainam Manik Syiem, Syiem Khynnah ka Hima Khyrim, Dolloi ka Jowai, u ma OR Challam President Seiñraij Jowai bad kiwei kiwei.

Hadien ba U Tymmen U San u la pyndep ïa ka nguh ka dem, la ailad pat ïa ki paidbah nongwan ban  kiew  halor ka duwan ka dupat ban ai ïa la ka nguh ka dem ka jong ki bad ba kin pynbud da ka jingshim ïa u khaweh u khaw khein bad ban pdiang ïa ka um ksiar ka um rupa ban ïoh ban rah sha la ki ïing ki sem khnang ban eh rngiew ka rwiang ryngkat ka jingker jingda u Blei Trai Kynrad.