Pyndep ka Seng Khasi Kmie ïaka kiew Pyneh Rngiew sha u Lum Sohpetbneng

Syllad | The Rising MeghalayaFebruary 6, 2022

Ka Seng Khasi Kmie, lyngba ka Lum Sohpetbneng Committee ryngkat ka Komiti u Tymmen U San, ki la pyndep ia ka ‘Kiew Pyneh Rngiew’ kaba shi sien shi snem sha kliar u lum kyntang ka jaidbynriew, u Sohpetbneng, kaba la long hynne ka sngi Robibar, ka 6 tarik Rymphang 2022.

Ia kane ka kiew Pyneh Rngiew, la pyndep ryngkat jingbud ia ka kyndon ba la pruid dak da ki bor synshar, katta, da kaba khlem da don palat ka jingia wan ban ia kiew paidbah, hynrei ki nongwan ki long tang ki dkhot nongkitkam ka Jylli Pyrkhat Kam, ka Komiti U Tymmen U San, ki dkhot ka Lum Sohpetbneng, nangta ki khmat nongialam ka Seinraij Shillong bad Jowai, ki khmat nongialam jong ki Jylli (Circle) bad ki tnat Seng Khasi.

Shwa ban kiew arted sha kliar u Sohpetbneng, U Tymmen U San, u da pynlong shwa ia ka nguh ka dem, ha khyrdop kaba don mar pyrshah bad ka pung Umiam, kaba hangne, la shim ia u khaw, ka um bad u khaw, ban pynlong ia ka nguh ka dem ka duwai ka phirat, ba kumba la dep ban ia pan naduh ka sngi jong ka Shi Hat ka Shi Taiew, jong ka jingpyndep ia ka lehniam ka leh rukom ha Lum Dorbar Lawnongthroh, ha ka Mei Mawbuh bad ha u Sohpetbneng, ba ryngkat u syiem mawshun, ban pynthiah sharud shakiar  ia ka sabuit ka sakai, ka dani ka  dai kot ka saw-bniat ka saw tyngam.

Hangne ban ia shai kein ka kam, la shat da ka lengbah ka lengsan, kaba pyni beit beit ia ka dak, ba kiei kiei baroh kumba la dep ban ia pan naduh ka myn nyngkong, ba ka kam hi donkam ba kan iaid beit shakhmat, ha ryngkat ka jngker jingsynran U Blei Trai Kynrad najrong na tbian.

Ynda haba la dep na khyrdop, ka la dei pat ka pali ban sdang ka kiew sha kliar u Sohpetbneng, hangne la ioh ia a kyntien maitphang na u Rgh I. Sun, Chairman Lum Sohpetbneng Committee ka Seng Khasi Kmie,uba la pynshai ba ka jingmut bad ka jingthmu ban kiew sha kliar u Lum Sohpetbneng, kum ka kiew pyneh rngiew ka long ban pynkhie im pat ia ka  Nguh Ryngkew Basa, ka duwai ka phirat khnang ban bit ban biang ka rep ka riang, ban pynneh bad pynsah da kaba tyngkai ia ki jingai jingbuh ka Lei Mariang bad ban ioh ruh ia ka khiah krat ka khiah stang.

Kumba U Blei Trai Kynrad U Nongbuh Nongthaw ula bynshet ha u Hynniewtrep Hynniaw Wasa ia ka jingngeit ha ka long niam ka long rukom ha ki lai mawbyrsiew kiba long ki sap tynrai Ban Tip Briew Ban Tip Blei Ban Tip Kur Tip Kha bad ban Kamai ia ka Hok.

Haba la dkut u Sohpetbeng, ka jingkieng ksiar, ba u bynriew u la san ban ieng rangbah ha la ki kjat, katta ‘Ieng rangbah u Briew bad ap jutang U Blei, kumba u Sohpetbneng uba la juh iai khein kyntang haduh katta katta, u iai ieng tyngkrein ban sakhi ia u sohpet kha u sohpet kur ka jingwan ban long briew man briew u Hynniewtrep Hynniewskum u Hynniaw Wasa.

Ia ka nguh ka dem la pyndep da u Rgh Skor Jala ba dei artad u Chairman ka Komiti U Tymmen U San ka Seng Khasi  Kmie  ryngkat ka jingia synran lang ki khmat nongialam ka Sein Raij, bad dkhot ka JPK.

Hadien ba la dep ka nguh ka dem ka pynsum ka pynsait ia ka duwan ka dupat, ba la plie lad ia ki parakur parakha  ba  kin ia kiew halor ka duwan ka dupat, ba kin kin ai ia la ka nguh ka dem ka dwai ka kyrpad ka kyrpon, ha U Blei Trai Kynrad ba un theh sei ia ka kyrkhu kyrdoh najrong na tbian ne ban map ruh ia ka lait ka let bynriew.

Ynda haba la dem ia ka nguh ka dem ba la sam ruh ia u khaw-eh u khawshan u khawkhein ban rah rneng sha la iing sha la sem ban ia bam shi symboh ar symboh bad ban tong pat ia ka um ksiar ka um rupa ban dih khnang ban eh ka  rngiew bad ioh ia ka kyrkhu ba dap kyrhai na U Blei Trai Kynrad.