Pyndep ka Seng Khasi Kmie iaka lehniam Shi Hat Shi Taiew

Syllad | The Rising MeghalayaJanuary 28, 2025

Ka Seng Khasi Kmie, lyngba ka kynhun Ki Tymmen U San bad ka Lum Sohpetbneng, haka 26 tarik u Kyllalyngkot 2025, ka la lah ha kaban pyndep ia kawei na ka jinglehniam kaba kongsan bad ba kyrpang tam ka jong ka, ba tip ia ka kum ka Shi Hat Shi Taiew, ha ki lai tylli ki bynta kiba kongsan u Lum Sohpetbneng.

Kane ka lehniam shi hat shi taiew, ka long kum shi bynta ka jingpynkhreh, ia ka Kiew Pyneh Rngiew 2025, kaban long ha ka 2 tarik u Rympang 2025, ha kaba ha kum kane ka sngi, ka juh don katta ka Kiew Pyneh Rngiew da u paid baiar ka bri Hynñiewtrep Hynñiaw Wasa.

Ki lai tylli ki jinglehniam ba ka kynhun Ki Tymmen Riew San hapoh ka jingialam u Chairman u jong ka u Rgh Skor Jala bad ka Lum Sohpetbneng Committee ki la lah ha kaban pyndep ha kane ka sngi ka long ba la sdang shwa da ka nguh ka dem, ka khnong ka bishar ha Lum Dorbar.

Hadien ba la biang lut ki dak ki shin bad ka jingiapan lyngba ki dak ki shin ha khmat ka lengbah ka lengsan, ba la kiew pat sa sha ka Mei Mawbuh. Kaba hangne la ioh ia ka nguh ka dem, ka knia ka khriam da kawei ka syair kynthei bad uwei u iar shynrang.

Hangne ruh ynda haba la khmih  bin pin ia ki dak ki shin, ba la hiar pat sha trai ka Mei Mawbuh, kaba hangne la pynlong ia ka pynsum ka pynsait da ka um ksiar ka um rupa, kaba la lam khmat da ki riew tymmen riew san bad bud pat sa ka jingiashim bynta paidbah.

Na ka Mi Mawbuh, ka lehniam  ka la long pat sa hakhmat u Mawkhan Maw Shong Blei, ha kaba hangne ruh ka leit da ka shat ka khein ka khnong ka bishar, ban ia pan hukum na ki ryngkew ki basa bad kumjuh na U Blei Trai Kynrad, ba ka jingwan ban kiew pyneh rngiew kan da long kaba da iaid beit, kaba suk kaba palei.

Ynda haba la dep ka nguh ka dem, ba la u Riew Tymmen Riewsan ki la kiew pat sha ka duwan ka dupat u Sohpetbneng, kaba hangne la pyndep ia ka pynsum ka pynsleh, ka nguh ka dem da u khaw, ka dak ban pynkyntang biang sa shisien ia ka duwan ka dupat.

Ha kawei pat ka khubor, u vice chairman jong ka lum sohpetbneng committee u Rgh P.B synrem, u pyntip ka jinglehniam napoh ka khyrdop kaba mar pyrshah ia ka pung umiam, kan sdang ha ka por  6 baje mynstep, ha ka step- jong ka 2 tarik u Rymphang 2025, kaba dei ka sngi kiew pyneh rngiew.

Hadien kane, ka lehniam kaba kongsan bad ba kyrpang tam kan sdang ha ka por 9 baje mynstep halor ka duwan ka dupat ba kyntang.

Ka jingthmu ban sdang kham kloi ia kine ki kam ki jam baroh ka long ban plie lad ia la ki para kur ki para kha ha ka nguh blei dem blei ka kyrpad ka kyrpon naka bynta ka jong ki bad ba kin ioh ban diang ti ia la u khaw eh u khaw khien ryngkat ka umksiar ka um rupa.

Na ka liang u Rgh Synrem, u ieng ban pynkynmaw ba ka lynti ban kiew sha kliar u lum sohpetbneng ka long kaba khim, ha kaba ki ba bun pat na ki nongwan bunsien ki ialeh ban wan beit da ki kali ki motor ki jong ki shajan jong une u lum.

Hangne u Rangbah Synrem, u la pynpaw ba ha kine ki khynbdiat taiew, ka komiti ka la pynkhreh ia ki jaka ban pynieng ia ki kali, d akaba pyn madan ia ki jaka kiba dei jong ka Seng Khasi, kaba hangne u kyntu ia ki parakur parakha ba kin sngewbha ba kin ia treilang bad ki nongiarap kam jong ka seng, ban nym ia kyrkieh ha ka liang ka leit ka wan bad ban long kiba iai shah.

Shuh shuh u da kyrpad bad kyntu ruh  ba donkam ban long kiba don akor don burom ha ka jingwan iashim bynta bad khamtam eh ban sumar khuid ia ka sawdong ka sawkun bad ban nym wiang ding klumar ia ki khlaw ki btab bad kumta ter ter.