Pyndep ka Sengbah ïa ka nguh ka dem Blei ba shi sien shi snem ha Baniuñ

Syllad | The Rising MeghalayaApril 3, 2021

Ka Sengbah U Nongshat Nongkhein Hynniewskum Hynniewtrep, hynne ka sngi ka 3 tarik u Iaiong 2021, ka la ioh ha kaban pyndep ia ka nguh Blei dem Blei kaba shi sien shi snem ka jong ka, ba la long ha shlem treikam jong ka seng, ha Baniuñ, Hima Mylliem.

Namar ka jinglong jingman ka pyrthei ka mariang ryngkat ki adong adit na ka liang ki bor synshar jong ka distrik, mynta ka kynti ka Sengbah, ka la leit beit beit tang sha ka phang ne ka lynti ba kan ioh ba kan pyndep ia ka nguh Blei Dem Blei, khlem da pynlong shuh ia kiwei pat ki prokram kum  ka shad ka kmen,ka rwai ka siaw ka put ka tem.

Nalor katta ka jingiashim bynta ka long long tang ki khmat nongialam jong baroh ki tnat jong ka Seng Khasi jong ki jylli bad ki tnat ka bri Hynñiewtrep Hynñiewskum.

Ka nguh ka dem kumba ka juh long ka long shwa da ka nguh ka dem ka duwai ka phirat  kaba long da ka um, u khaw, bad ruh ba la ioh ia ka jingkyntiew ia ka lama ka seng, ba la kyntiew  da u Rgh KS Lyngdoh ba dei u nongaibuit (advicer) jong ka seng.

Hadien kane, ka la dei pat ka bynta ka jingpyndep ia ka nguh ka dem kaba long da kawei ka ïar kynthei bad uwei u ïar ryngkuh, kaba long kum shi bynta jong ka jingpyndep ia ka knia ka khriam, ka jingiapan ia katta ka shithi ka dulir na U Blei Trai Kynrad, la la biang ne em ka nia ka jutang u khun bynriew  kaba u da ieng ba un ia said ia thew  bin ba bin, ban buh ia ka kyrpad ka kyrpon, ha  khmat U Blei ryngkat ha ki ryngkew ki basa, ban ri ban  kdup ban da ban ker ban sumar ia ka ri ka muluk, ba u nongwei u nong-ar ba un shynraiñ ha kaban wan ban thom buit thom bor, ba ka pap ka sang, ka tyrut ka smer, ka pang ka shitom, ka jynjar ka lanot  kin her krad sha ba sep ka sngi sha ba sep u bnai ba kin da ngam kin da rieh sha ka krem ka kroh.

Ha kine baroh ki jingiapan u bynriew na u Blei, ki dak ki shin kiba wan ban mihpaw kat kum ka kyntien ksiar ka kyntien rupa ba  longsan mansan  u la ud la nam halor ka duwan ka dupat, ba ka shithi ka dulir na u kynrad, ki paw ia ki dak ba u la hun la pdiang ia kane ka ainguh ka aidem jong u   khun  bynriew.

U Rgh Pranshon Jala ba dei artad u President ka seng, u la ong ba ha u snem ba la dep, la ia kynduh ia ka khlam ka ngoh, ha kaba ka Sengbah ka dap da ka jingsngew diaw mynsiem bad khia jingmut, tad haduh  ba la duh thiah duh dem.

Pynban haba la leit sha ka khan ka bishar la lap pynban ba kam shym la dei satia katta ka khlam ka ngoh, hynrei mynta pat u snem 2021, ynda haba la dep ban khnong ban bishar ban khmih  bniah, la lap ba ka ktien Blei ka pynpaw ia ki dak ki shin sha u khun bynriew ba um dei shuh ba un dang tieng dang smiej, katba ia kita kiba la ryngkang ba la ryngkoh, ba la thaw mon kren mon, ia kita pat ki dak ki shin na u Blei ka kren shai kdar ba ia kum kita u la mynthi u la kuman, la bynrap u Rgh Pranshon Jala.

Shuh shuh u Rgh Pranshon Jala u la ong ba  kaei kaei kaba la wan ban jia baroh ki dak ki shin ki paw tyngkrein ba kadei na ka pap ka sang u khun bynriew, kaba da khyrwait kylla  kaba bynrap sa ka sang ka ma da kaba khlem da khein snep shuh ia ka hukum Blei, kaba kumu Tymmen u San ki da pangnud bad ki juh panmap ia ka let ka lait u bynriew.

Nalor u Rgh Pranshon, kiwei kiwei pat ki tymmen ki san ka  ba la shim ia laka bynta ban pyndep ia ka nguh ka dem ka lehniam lehrukom ki long u Rgh Tailan Rynjah, u Rgh Pynshai Kurkalang katba ka dwai um la pyndep da u  Sbarshon Umdor.

Hadien ba la dep lut ki kam jam, ka la don ka jingsam ia u khaweh u khaw khien bad ia ka um ksiar ka um rupa ban ioh ban ia rah rneng sha la ki iing ki sem.