Pyndep ki 37 ngut ki samla ha ka kam hikai suhjain ba la khot pynlong da ka ASTC bad MSSDS ha Mowkyndeng

Syllad | The Rising MeghalayaDecember 23, 2024

Ia ka jingleh burom bad sam syrnot sha ki 37 ngut samla kiba la pyndep ia ka jingshah hikai ha ka kam suhjain ba la khot pynlong da ka Auxilium Skills Training Centre, Khapmara ryngkat ka jingiatreilang bad ka Meghalaya State Skills Development Society (MSSDS), la pynlong ha ka 20 tarik Nohprah ha St. Francis Convent Mowkyndeng.

Ha kane ka jingialang sam syrnot la ia don lang ruh u Dr. FR Shadap, BDO ka Laskein Block, Bah Lambormi Suchen, SDO ka West Jaintia Hills District, Jowai, u Rangbah Shnong ka Mowkyndeng Madankynsaw u Bah Rimanki Chympa, Sr. Jubil Mary Dkhar Director ka Auxilium Skills Training centre Khapmara, Sr. Jemma Phyllei, Sr. In-charge ka St. Francis Convent Mowkyndeng, Sr. Rodalin kamar administrator ka Auxilium Skills Training centre Khapmara lem bad kiwei kiwei.

Ha ka jingkren kum u Kongsan u Dr FR Shadap u la ai khublei kyrpang ia baroh kine ki 37 ngut kiba la lah ban pyndep ia ka jingshah hikai ha kane ka kam suhjain, bad u la pynshlur ruh ia ki ba kin pyndonkam ia ki sap ki phong kiba ki la ioh lyngba kane ka jingioh jinghikai khnang ba kin lah ban kiew ha ka liang ka ioh ka kot. U la ai khublei kyrpang ruh ia ki nongpyniaid jong kane ka prokram aijinghikai namar ka jingaiti lut bad ka jingioh jngai na ka bynta ban kyntiew bad pynroi ia ki sap ki phong.

Na ka liang u Bah Lambormi SDO, West Jaintia Hills ha ka jingkren u la batai bniah ha kaba iadei bad ki jingshem halor ki prokram pynroi ia ki sap ki phong ha ka imlang ka sahlang, bad u la pynpaw ruh ia ka jingdonkam jong kiba kum kine ki sienjam na ka bynta ban lah ban kyntiew ia ka ioh ka kot bad ka roi ka par ha ka imlang ka sahlang.

Katba na ka liang u Rangbah Shnong u Bah R Chympa u la ai ka jingiaroh ia ki sienjam ba la shim da ka Auxilium Skills Training Centre, Khapmara bad ka Sub Centre Mowkyndeng ryngkat ka jingiatreilang bad ka MSSDS na ka bynta ban pynlong ia kaba kum kane ka prokram aijingshikai na ka byna ki samla.

Ha kane ka sngi la ioh ruh ka jingkren ai  mynsiem lyngba i Kong R Saioo iwei na kiba la ioh ia ka jinghikai ha kane ka kam kumno ba ka la ktah ia ka jingim ba shimet jong i bad halor ka jingkit ha ka liang ka ioh ka kot.

Hadien kane la sam ia ki syrnot sha baroh kine ki samla kiba la pyndep ia ka jingshah hikai kum ka dak ka jingithuh ia ka jingtrei minot bad ka jingaiti lut ka jong ki kat haduh ban da pyndep ia kane ka jingshah hikai bad ba kin lah ban ieng ha la ki jong ki kjat ha ki jingtrei jingktah ki jong ki bad ban kiew ha ka liang ka ioh ka kot bad ka roi ka par.