Pyndep ki 61 ngut haka kam pahara na ka Tornado Security Agency

Syllad | The Rising MeghalayaJanuary 13, 2024

Ka Sub Center Tornado Security Agency kaba don haka Shnong Umdeinlin, West Jaintia Hills District haka 12 tarik Kyllalyngkot ka la sam syrnod shaki 61 ngut ki samla shynrang bad kynthei kiba la pyndep iaka jinghikai kaba 45 sngi ban long ki nongap pahara ne Security Guard.

Na ki 61 ngut ki samla kiba don hapdeng ka rta 18 haduh 40 snem, 23 ngut dei ki kynthei, 38 ngut dei ki shynrang bad ba la ai jinghikai da ki arngut ki nonghikai batbit kiba kynthup ia u Yooluti Pakma bad Ferdina Muksor.

Hashwa ban sam syrnod shaki 61 ngut ki samla, la don ka jingialang ba la pyniaid da u Camp Commander & Training Incharge uba dei ruh u trai jong kane ka shlem hikai u Bah Pyndaplang Muksor, haka jingdonlang u Bah Winning G. Sungoh kum u kongsan, u Rev. Samuel Myrphet, u waheh Shnong Umdeinlin Bah Nangai Sutnga, ki bahaiing hasem jong ki samla, ki katto katne ki nongialam shnong nalor kiwei kiwei kiba shah khot sngewbha.

U Bah Pyndaplang Muksor haka jingkren, ula iathuh ba u ju trei kum u pulit (Battalion) naduh 2008 hynrei ula iehnoh kane ka kam bad wanrah da ka shlem hikai khnang ba ki samla kin ioh lad ban trei ha ki kam bapher bapher.

Ula ong lyngba ka syrnod, ki samla ki lah ban ioh kam ioh jam bad long ki nongap pahara haki ophis treikam sorkar, Hospital, ki iew heh (Mall), ki Bank, nalor kiwei kiwei.

U Bah Winning G. Sungoh haka jingkren ula iaroh iaka sienjam jong u Bah Pyndaplang Muksor bad ula ai ka jingkitbok kitrwiang ba un nangiaid shakhmat ha kane ka kam khamtam ha kum kane ka juk kyrduh kam kyrduh jam ki samla.

Ka jinghikai kaba phi ioh na kane ka shlem hikai kamdei ka jingkut, hynrei kadei ka jingsdang jong ka lynti iaid jong ka jingim jong phi. Ka por ka la dawa ba phin kyrshan ymtang ialade hynrei iaka iing ka sem ruh kumjuh, la ong u Bah Sungoh.

Ula bynrap ba “Ka syrnod ba ki samla ki ioh pdiang kadei ka waitlam ban pynshisha ba ki long kiba bit pura ban long ki nongap pahara”., la ong u Bah Sungoh.

U Rev. Samuel Myrphet ula shim smai iaki 61 ngut ki samla kiba la pyndep iaka jinghikai bad ha kajuh ka por ula kyntu ban long ki samla kiba shlur, kiba shaniah ha U Blei, kiba treihok bad ieng skem ha ka nongrim.