Pyndep ki Saw Langdoh ia ka lehniam knia Pyrthat ha Raij Jowai

Syllad | The Rising MeghalayaJuly 1, 2021

Wat hapdeng ka jingwan lynsher ka jingpang khlam Covid-19 ka jing pynkhreh bad pyndep ia ki jinglehniam bapher ha ka jingiadei bad ka shad niam Behdieñkhlam hapoh ka Raij Jowai ka long kaba iaid shakhmat.  

Mynta ka 1 tarik u Naitung, ka Dorbar Niam ki khun ka Raij Jowai hapoh ka jingpeit jingpyniaid u Dolloi waheh Puramon Kynjing ryngkat ka jingiadonbyntalang kiwei Langdoh ryngkat ki shakri niam jongki kum na ka Raij Chyrmang, Raij Tuber bad Raij Ialong ki la wan ban iadobyntalang ha ka ban pyndep ia kawei na ki rukom lehniam ne knia ainguh aidem ba shisien shisnem kyrpang ia u Syiem Pyrthat.

Ha kane ka jinglehiam ne knia ainguh shwa ban mih na iing Langdoh iingkyntang ka Raij Jwai ladon ka jinglehniam ba la pyndep hapdeng ka jingiadonlang ka Langdoh ha kaba u Dolloi ryngkat u Langdoh, U Pator, ki Sangot bad ki Wasan waheh kin shim ban peit bad bishar ia ki dak ki shin ba  mih paw ha ki lai tylli ki Kpu Niam ba la shet da ka Langdoh.

Ia kane ka lehniam ne knia ainguh la pyndep halor u Lumkyndong ha kaba  u Sangot Paswet  ryngkat ka jingsynranlang u Sangot Pakyntein bad u Sangot Pasubon ki la shim ban pyndep ia ka lehniam hakhmat ka duwan kaba long kat kum ka rukom dustur jingngeit niam u khun hynniewtrep hynniewskum.

Hadien ba ki la pyndep ia kane ka jinglehniam na Lumkyndong ka bynta ba dangsah jong ka jinglehniam la pyndep ha Madan bamknia Pyrthat ha kaba ki khun ka Raij Jwai ryngkat ki riew rangbah na Raij Chyrmang, Raij Tuber bad Raij Ialong ki la wan ban iadonbyntalang hapdeng  ka jingduna paid bad bud ia ki kyndon sorkar.