Pyndonkam iaka jingstad kaba mih nalade khlem shaniah haka AI; ong u Rakkam haba pynkut iaka Golden Jubilee ka Nongtalang Govt SS

Syllad | The Rising MeghalayaDecember 14, 2024

Ka jingnang jingstad kadei tang ma ka, ka iktiar kaba lah ban pynkylla ia u briew, ka imlang sahlang, ka District, ka jylla bad ka ri, la ong u myntri ka tnad pule puthi ka sorkar Jylla Rakkam A Sangma haba kren haka sngi pynkut iaka jinglehkmen Golden Jubilee jong ka Nongtalang Govt Secondary School, Nongtalang haka 13 tarik Nohprah.

Ha kane ka jinglehkmen jubilee la iadonlangt u MLA ka thain bad Adviser ka sorkar Jylla Bah Lahkmen Rymbui, ka Jt. Director of School Education & Literacy bad Incharge DSEO West Jaintia Hills District Kong AP Syiem, SDO Amlarem Civil Sub-Division, Amlarem Dr. Abhishek Saini, IAS, ki ophisar na ki tnad treikam sorkar bapher, ki riew rangbah ka thain, ki nonghikai, ki khynnah skul, ki Past pupil, ki kmie ki kpa nalor kiwei kiwei.

Haba bteng iaka jingkren, u Myntri ula kren halor ka jingkiew jong ka jingstad teknoloji h kaba ki briew ki ju shaniah haka na ka bynta ka jingim kaba man ka sngi bad ki jingthmu bapher bapher. Ula kyntu ruh iaki khynnah skul ba kin shimkhia bad kitkhia haki jingpule da kaba pyndonkam iaka jingstad kaba mih na lade ne Natural Intelligence khlem da shaniah haka jingstad technology ne Artificial Intelligence (AI).

Shuh shuh ula ong ba ka jingstad thymmai ne Artificial Intelligence kan sa long kawei na ki jingeh na ka bynta lang baroh bad ula kyntu ia baroh ki samla pule bad ki nonghikai ka jylla, ba lada kim nang ne lah ban ai iaka jinghikai kumba dawa ka por mynta yn sa shah bujli haka Tecknoloji.

Don kiba ong, ba haki khyndiat snem ban wan, ka artificial intelligence kan sa bujli iaka kyrdan briew, kane kadei ka jingeh kaba ki paidbah kin sa iakynduh, la ong u Rakkam A Sangma bad kyntu ruh iaki nonghikai jong kane ka juk mynta ba kidei ban pynkhreh bha iaki khynnah khnang ba ka jingstad tynrai ne Natural Inteligence kan kham halor ban ia ka jingstad thymmai ne Artificial Intelligence.

U Bah Lahkmen Rymbui haka jingkren ula kyntu jur iaki khynnah ban pyndonkam iaka jingstad ba shisha ka jong ki ryngkat bad ka jingstad kaba ki ioh lyngba ka teknoloji khnang ban lah ban ialeh pyrshah iaka pyrthei.

Ha kane ka sngi pynkut iaka jinglehkmen Jubilee Ksiar, la pynkup burom ruh iaki 7 ngut ki dkhot SMC barim bad Lai ngut ki nonghikai barim.

Nalorkata la pynkup burom ruh iaki Lai ngut ki soh nyngkong jong ka skul kiba pyndep iaka Matriculation ba kynthup u (L) Puramon Tariang, Chuina Bareh bad Baiaishah Lapasam.

Shuh shuh la pynkup burom ruh iaki lai ngut ki khlur jong ka skul kiba la wanrah nam rah burom haka jingiakhun iaka eksam Matrik haki snem ba la leit noh ba kynthup ia u Khlur Lyngdoh uba la wan haka kyrdan 7th position haka thup Top 10 HSLC ha u snem 1997, ka Buirity Pohsnem kaba la wan haka kyrdan 19th position haka thup Top 20 SSLC ha u snem 2017 bad u Arkiman Manar uba la ioh khur Highest Mark haka subjek Agriculture SSLC 2024.

La pynphuh pynphieng ia kane sngi da ki jingrwai jingshad ba la shim bynta da ki khynnah skul kumjuh ki Past pupil nalor ka jingwan pynshong shit iaki khynnah skul da ka jingwan iashim bynta u kaitor ba paw ka Jylla u Banker Kharkongor.

Ha kane ka sngi u kongsan ula pyllait ruh iaka kot souvenir jong ka skul.

Khyndiat shaphang ka Nontalang Secondary School, la seng da ka Dorbar shnong Nontalang ha u snem 1974 da kaba sdang nyngkong eh iaka M.E School ha u snme 1961 na ka bynta ka Class V bad ka jingdon ki khynnah skul ka long tang 6 ngut, katba iaka High School la sdang ha u snem 1974. Ha u snem 1986 la pynlong iaka High School hapoh ka Deficit system da ka sorkar Meghalaya bad ha u snem 1988 la provincialise ne pynlong skul pura ia kane ka High School bad ha u snem 1999 la rakhe iaka Silver Jubilee jong kane ka skul bad la tip ruh iaka kum ka Nontalang Govt. Secondary School.