Pyngngat Micro Containment iaki ar shnong ha Shangpung

Syllad | The Rising MeghalayaJune 21, 2021

U District Magistrate, West Jaintia Hills District ula pyngngat Micro Containment ia ki ar tylli ki shnong kata ka Shangpung Moolibang bad ka Shangpung Mission hadien bala don ki nongshong shnong kiba la iabit iaka jingpang khlam COVID-19.

U District Magistrate ula pynmih iaka hukum haka sngi Nynkong bad kane ka hukum kan treikam tad haduh bala pynbna da kumwei ban pyndep iaka jingbuddien ia ki briew kiba shah ktah bad kiba lah ban shah ktah na ka jingpang khlam COVID-19.

Ka hukum ka ong ym shah ia kino kino ban rung sha kine ki shnong kiba la pynbna containment.

Ki nongshong shnong kiba na kine shnong kiba la shah pyngngat containment ruh kim bit ban mih klumar bad ba ki dei ban pynkyrpang ialade ha iing.

Ym shah ban pynlong kino kino ki jait jingialang bad baroh ki dukan dukdoh ki dei ban khang.

Baroh ki ophis sorkar bad ki jong ki riew shimet ruh ki dei ban khang ha kine ki ar tylli ki shnong kiba la shah pyngngat containment bad ki kali kiba iaid lyngba kine ki shnong kiba wan na shabar ka containment kim bit ban sangeh hapoh u pud u ang kine ki ar shnong.