Pynhap pyrda ka Mawdieja S&CC, Sohryngkham ia ka jingrakhe dap 30 snem

Syllad | The Rising MeghalayaFebruary 15, 2021

Ka Mawdieja Sports and Cultural Club (MS&CC), Sohryngkham haka sngi Saitjaiñ ka la pynhap pyrda ia ka jingrakhe dap 30 snem jong ka bad kumjuh ia ka lympung ialehkai phutbol ba la pynsah nam ia u (L) Lastkingroy Warkhyllew, u samla rangbah uba mih khmat ha ki kam ialehkai phutbol na ka Club bad na ka Shnong Sohryngkham bad uba ju leh bun ki kam ban kyntiew ia ki kam ialehkai ha katei ka thaiñ, uba la khlad noh ha u snem ba la dep na ka jingjia aksiden kali ha u snem 2019.

Ha kane ka sngi, u Bah Pynïaid Sing Syiem, MDC ka Sohryngkham uba dei ruh u Chairman ka Khasi Hills Autonomous District Council (KHADC) u la wan ban ia donlang kum u Kongsan. Ha kane ka janmiet la pyllait paidbah ruh ia ka ‘thup sah kynmaw’ (souvenir) jong ka MS&CC. Ka MS&CC ha ka jingrakhe ia ka jingdap 30 ka la pynlong ia ki prokram jingiakop ialehkai bapher bapher.

Ia ka jingialang pynhap pyrda ia ka jingdap 30 snem bad kumjuh ia ka lympung ialehkai phutbol la pynlong ha Mawdngong Mini Stadium, Mawdieja ha ka Shnong Sohryngkham. Ha kane ka sngi la sam ia ki khusnam sha ki samla ialehkai kiba la jop ha ki jingiakop ialehkai bapher bapher, ki jingpynkup burom ia ki bahaïing u (L) Lastkingroy Warkhyllew, kumjuh ia kiba la noh synñiang sngewbha da ka jaka ba la shna ia ka madan ialehkai bad kiwei kiwei pat.

Ha ka jingïalehkai phainal jong ka lympung 1st (L) Lastkingroy Warkhyllew Memorial FT, ka Mawlyndep FC ka la rah ia ka nam lahduh da kaba pynliem ia ka Combined FC da 3-2 kol. Ha ka kylla step, ka Combined FC ka la thep shwa ia ka kol ba nyngkong ia kaba la ban pynphai kylla da ka Mawlyndep FC ban pynlong ia ka jingiakhun ha ka kylla step ban iakhaid da 1-1.

Ka jingïalehkai ka la long kaba ia khaid haduh katta bad ha ka kylla miet, ka Mawlyndep FC ka la ïoh ban thep sa 2 kol katba ka Combined FC ka la ïoh ban pynphai sa tang shi kol ha shwa ba u referee un pynwai ia ka jingiakhun. Ka Mawlyndep FC ka ioh khur ia ka song pisa ba T.30 hajar bad ka Trophy katba ka Combined FC ka la ïoh khur ia ka song pisa ba T.15 hajar.

Ia kane ka jingpynhap pyrda ia ka jingrakhe dap 30 snem bad kumjuh ia ka lympung phutbol la dei ban pyndep ha u snem 2020 hynrei na ka daw ka jingdon ka khlam COVID-19 la hap ban sangeh bad pynlong noh myn ha ka Sngi Saitjaiñ. U Bah Pynïaid Sing Syiem u la sam ia ki khusnam sha ki kynhun ialehkai kiba la poi sha ka phainal bad ha ka jingai jingkren u la kyntu ia ki samla ban nang iai minot bad leh bha ban sei ia ki sap ha ki jingïalehkai bapher bapher.