Pynhap pyrda ka MSSA ia ka 2nd Meghalaya Open Speed Skating Championship

Syllad | The Rising MeghalayaDecember 18, 2023

Ka Meghalaya Speed Skating Association (MSSA) ka la pynhap pyrda noh ia ka “2nd Meghalaya Open Speed Skating Championship” ha ka 16 tarik mynta u bnai ha ryngkat ka jingiatreilang bad ka St. Anthony’s Higher Secondary School bad ka Meghalaya Roll Ball Association ha madan ialehkai jong ka St. Anthony’s Higher Secondary School.

Ha kane ka lympung ialehkai kiba ha la ki jong ki rta bad kyrdan la wan iashim bynta da palat 50 ngut ki nongialehkai na ki district bad ki skul bapher bapher.

Ha kane ka jingiakop ki nongiashim bynta ki la ioh ia ka lad ban pyni ia la ki jong ki sap ki phong bad ia ka mynsiem ialeh ka ban kyntiew shibun ia ki kam ialehkai sport hapoh ka thain.

Na ka liang u Bah Suklang Dkhar, President ka Meghalaya Speed Skating Association bad u General Secretary ka Meghalaya Roll Ball Association ha ka jingkren ki la pynpaw ia ka jingsngewhun halor ka jingseisoh jong kane ka lympung ialehkai bad pynpaw ia ka jingangnud ban nangkyntiew shuh shuh ia ka jingiakop Speed Skating ha ka jylla.

Ki nongjop ha ki kyrdan bapher bapher ki la ioh pdiang ia ki medal bad ki certificate, katba ka jingjop kaba kongsan ka long halor ka jingdon ia ka mynsiem ialehkai bad ka jingtrei shitom kaba la pynlong ruh ia ki nongialehkai bad ki nongwan sakhi ba kin don ia ka jingangnud ban lah ban nangkyntiew shuh shuh ia ka jingialehkai Speed Skaking bad Roll Ball hapoh ki shnong ki thaw.

Kumjuh ha kane ka sngi pynhap pyrda la ia don lang ruh u President ka Meghalaya Roll Ball Association. Na ka liang ka Association ka ai ka jingkhublei ia baroh ki dkhot, Principal ka St. Anthony’s Higher Secondary School, ki kmie ki kpa bad ki nongiashim bynta halor ka jingseisoh jong kane ka lympung ialehkai.