Pynheh iaka surok Shillong Jowai bad pynshitom iaki nongniah kali khlem akor ong ka JSU

Syllad | The Rising MeghalayaJanuary 2, 2022

Ka Jaintia Students’ Union (JSU) kala ai da ka jingthoh sha u Superintendent of Police, West Jaintia Hills District bad kala kyntu ia ban pyrkhing iaka rukom niah kali ha surok bah namar ka jingthurmur ka rukom nongniah kali kaba la wanrah iaka jingdheng kali ba khah khah ha surok bah NH 6 ne Shillong Jowai Road bad ka NH 40 E Dawki Amlarem Jowai.

Ka JSU kala kynnoh ba ka jingdheng kali ka jia long namar ka jingbym iaishah ki kali naduh kiba rit haduh kiba heh ban iaid ha surok.

Ka JSU kala ong ba ha kine ki kyndiat sngi hadien ba don ki kali ba sinew ha surok bah Shillong Jowai kala wanrah iaka jingsahkut kali kaba bun bun kynta ha Mawryngkneng Puring Mookyndur. Kane ka jingsah kut kali kala jur namar ka jingtur ki kali ban shim pass klumar kaba la wanrah iaka jingsyrtap kali na baroh arliang ka surok bad ym lait shuh ki kali ban iaid, la ong ka JSU.

Katkum  ka jingthoh kaba la ai ka JSU sha u SP ka West Jaintia Hills kala ong “ka tnat pulit kam dei ban ailad iaki trok bad kiwei ki jait kali ban iaid khlem akor bad dei ban pynshitom katkum ki kyndon aiñ niah kali.”

Ka jaka kiba blok kali khah khah kadei ka surok na Shillong-Jowai bad sha ka thaiñ Amlarem-Nongtalang namar ka jingiaid khlem akor ki kali khlem pyrkhat shuh iaki paitbah kiba iaid kiba ieng.

“Ngi kyntu ba phin pynshitom iaki trok bad kali rit kiba iaid khlem akor bad shim pass klumar ha ki surok bah khnang ban pynsuk iaka iaid ka ieng kiba shitom saja bad kiba thmu ban leit shim dawai ne phah sumar sha hospital bad u paidbah salonsar,” la ong ka JSU.

Ka JSU kala ong ba sorkar ba la dei ban shim iaka surok Shillong Jowai kum ka surok kaba kongsan bad wad ki lad ki lynti ban pynheh noh ia ka surok Shillong ban suk u paidbah.