Pynher krad ka JNC ia palat 40 ngut ki bar jylla kiba trei beain hapoh ka karkhana dewbilat 

Syllad | The Rising MeghalayaApril 3, 2025

Ka Jaintia National Council (JNC) lyngba ka Employment Commission ha ka 2 tarik Iaiong ka la pynher krad ia palat 40 ngut ki bar jylla kiba trei hapoh kawei ka karkhana dewbilat ha East Jaintia Hills hadien ba la shem ba kim don satia ia ki kot ki sla kiba biang kum ka Labour License bad kiwei kiwei.

Ka JNC hapoh ka jingialam jong u Chairman u Bah Ency Shadap bad u Secretary u Bah Mebanteilang Sukhlain ka la lap ia kine ki bar jylla kiba wan trei beain hadien ba ka la pynlong ia ka jingleit jurip kaba kyndit hapoh Amrit Cement.

Hadien ba la pynphai biang ia kine ki palat 40 ngut ki nongtrei bylla bar jylla sha ki jaka kiba ki wan ki nongialam ka JNC ki la maham tyngeh ruh ia ki nongpyniaid jong ki karkhana halor kano kano ka jingwanrah ia ki nongtrei na shabar ka jylla haba ki trai shnong ki kiba kiba lah ban trei ia ka kam.

Ha u kyrwoh u General Secretary ka JNC-CEC u Bah Wanshwa Suting u la ban jur ruh ba ka Employment Commission kan dang iai bteng ban pynlong ia ki jingtalasi sha kiwei pat ki karkhana hapoh ka thain khnang ban tehlakam ia ki nongtrei bylla ki bym don ia ki kot ki sla kiba biang.

Ka JNC ka pynpaw ruh ba kane ka jingkhynra kaba dei shibynta jong ka ‘Save Jaiñtia Mission’ kalong ban kyntu ia ka Sorkar Jylla ba kan pyntreikam noh ia ki policy kiba thymmai ki ban shim kongsan halor ka thungkam thungjam ia ki trai shnong khamtam ha ki karkhana kiba don hapoh Rilum Jaintia.