Pynher krad ki nongshong shnong ka Lapangap iaki nongtrei surok ka Assam

Syllad | The Rising MeghalayaOctober 2, 2020

Ki paidbah nongshong shnong jong ka Lapangap, ka shnong kaba don ha khappud Meghalaya Assam kiba la khie bitar iaka jingmynthi jong ka sorkar Jylla ban iada ia u pud u sam, kila hiar dalade ban pynher krad ïa u nongbylla shna surok ka Assam haka sngi Palei.

Ka ka surok kaba shna ka Assam kadei ka surok ban pynïasoh ïaka shnong Khanduli naduh na Tahpat, Langkeroi, Lapangap. La iathuh ba ka sorkar Assam kala mang pisa kumba 774.24 lak ban shna ia kane ka surok khlem ka jingmynjur jong ka sorkar Meghalaya bad u paidbah ba sah ha khappud Meghalaya Assam.

Ka jingtrei ia kane ka surok kala iaid naduh u snem 2019 u bnai Naitung (July) bad la pynsangeh ruh da ka bor district jong ka West Jaintia Hills, hynrei ka sorkar Assam kala iaid beit shakhmat ban trei ia kane ka surok kaba la pynlong iaki nongshong shnong ban pyrshah jur namar ba ka Assam kala kyntur ïaki pud u sam bad ki jaka rep jong ki.

Ki paidbah jong ka Shnong Lapangap hadien bym don kino kino ki dak ki shin ba ka sorkar kan tuklar ia kane ka jingtei jong ka sorkar Assam, ula mih paidbah ban pynsangeh hi noh dalade bad pynher krad iaki nongtrei surok baroh.

Iaid beit ka jingshna surok ka Assam, kynnoh kyntur jaka sha Lapangap

Ha kane ka jingleit pynsangeh ki nongshong shnong ka Lapangap kam don kano kano ka jinghuri hura bad ki nongtrei surok ka Assam kila kohnguh bad pyllum pyllang iaki tiar ki tar bad mih na katei ka jaka.

Ka Border Magistrate ka Kong B Blah haryngkat u Dy SP Headquarter u bah MJ Marngar bad ka kynhun pulit jong u kila hiar sha katei ka thain ban sakhi.  

Shuwa ban beh iaki nongtrei surok ka Assam kala don ka jingialang lyngkot ha iing dorbar jong ka shnong Lapangap kaba la iashim bynta da ki nongshong shnong rangbah shynrang, ki longkmie bad ki samla shynrang bad kynthei.

U Waheh Shnong Lapangap u Deimonmi Lyngdoh, ula ong naduh ba sdang ka Assam ban pyntrei iaka surok ka Dorbar Shnong Lapangap bun bun sien kala ujor sha ki bor District ka West Jaintia namar katei ka jaka ba shna surok ka Assam kahap hapoh u pud u sam ak Jylla bad ka don hapoh shnong Lapangap kaba iaid lyngba kiba bun bah ki pynthor bad hali jong ki nongshong shnong. 

“Ka bor District naka por shaka por ka phah iaka Border Magistrate bad ki pulit Meghalaya ban leit pynsangeh iaka jingshna iaka surok bad ka Assam ruh ka la sangeh iaka jingshna hynrei tang hadien shisngi arsngi ka Assam ka bteng ia kajuh ka jingshna bad mynta ka iaid shait shait ban shna iaka surok,”la ong u ma Deimon Lyngdoh Waheh Shnong.

“Ngim banse ban beh krad ia kine ki nongtrei surok ka Assam ban iada iaka jakpoh bad ka hok kynti jong ngi,” ong u Ma Deimon.

U MDC ka Mynsngat-Khanduli u Dawan Lyngdoh uba la don ryngkat ha kane ka sngi ula ong ka Assam ka la leh jubor bad kala ktah iaki hali ki pynthor jong ka Lapangap kaba hap hapoh ka Elaka Shilliang Myntang. “Ngin ieng beit haka nongrim ban iada iaka jaka puta jong ngi kiba biang lut ki kot ki sla bad da lei lei ngim ym ailad iaka Assam ban nang kyntur shuh shuh sha u pud u sam jong ngi,” ong u ma Dawan.