Pyni bor ka sorkar Assam, sdang siang biang iaka surok ha Lapangap

Syllad | The Rising MeghalayaJanuary 10, 2021

Ka sorkar Assam kala sdang biang ban trei iaka surok ban pyniasoh iaka  ïaka shnong Khanduli naduh na Tahpat, Langkeroi, Lapangap bad kane kala wanrah ka jingpyrshah kaba jur na ka bor shnong jong ka Lapangap bad KSU Lapangap.

Kane ka jingpyntrei ia kane ka surok ha Pdein Charieñ, Lapangap kala sdang biang ha kine ki khyndiat sngi da ka jingsynran ki pulit Assam wat hadien ka jingpyrshah kaba jur jong ki nongshong shnong Lapangap naba kane ka surok ka iaid lyngba ki jaka rep bad ki jaka jong ki nongshong shnong ka Lapangap.

Ka jingtrei ia kane ka surok kala iaid naduh u snem 2019 u bnai Naitung (July) bad la pynsangeh ruh da ka bor district jong ka West Jaintia Hills, hynrei ka sorkar Assam kala iaid beit shakhmat ban trei ia kane ka surok kaba la pynlong iaki nongshong shnong ban pyrshah jur namar ba ka Assam kala kyntur ïaki pud u sam bad ki jaka rep jong ki.

Ka surok na Tahpat Lapangap Khanduli kadei tang ka kam maramot: DC West Karbi Anglong

Haka 1tarik u Risaw 2020 ki paidbah nongshong shnong jong ka Lapangap, kiba la khie bitar iaka jingmynthi jong ka sorkar Jylla ban iada ia u pud u sam, kila hiar dalade ban pynher krad ïa u nongbylla shna surok ka Assam, hynrei hadien lai bnai bala sangeh iaka jingtrei ka sorkar Assam ryngkat ka jingsynran ki pulit iaki nongtrei bylla shna surok kala sdang biang ban trei jubor ia kane ka surok.

Ka Dorbar Shnong Lapangap bad KSU Lapangap bad Khanduli-Umshangiar unit ki pynrem jur ia katei ka jingleh donbor biang jong ka sorkar Assam. Ka Dorbar shnong Lapangap bad ka KSU Lapangap bad Khanduli-Umshangiar unit ka kyrpad ia ka sorkar jylla ban iakren bad ka sorkar Assam ban pynsangeh mar dor ia ka jingpyntrei ia u tei u surok. 

Pynher krad ki nongshong shnong ka Lapangap iaki nongtrei surok ka Assam

Kumban shu pynkynmaw ba haka jingialang jong ki ar DC ka West Karbi Anglong bad ka West Jaintia Hills District kaba long haka 20 tarik Risaw 2020, u Deputy Commissioner, West Karbi Anglong u Syed Isfaqur Rahman ula ong ba kane ka surok ka ban pyniasoh iaka Tahpat, Lapangap bad Khanduli kadei ka surok kaba rim bad ka kam kaba la pyntrei kadei tang ka kam maramot bad ka dei kaba la don naduh mynshuwa.

Ka bor shnong jong ka Lapangap ka ieng haka nongrim ba kane ka jaka ka hap hapoh u pud u sam ka jylla bad ka dawa n aka bor district ban pynsangeh ia kane ka jingpyntrei surok