Pyni bor ki kharkhana dewbilat iaka JAC, ym treh ai bai kit mar thymmai

Syllad | The Rising MeghalayaJune 15, 2020

Ka Joint Action Committee kaba iasoh lang ka Jaintia Hills Truck Owners and Driver Association (JHTOA) ka All Jaintia Cement and Clinker Transports Association (AJCCTA) bad ka Meghalya Trucker Union (MTU) kila shah pyni bor ha ki nongpyniaid iaki kharkhana dewbilat ha East Jaintia Hills ha kaba kine ki kharkhana kila kren shai ba kim lah ban pyntreikam iaka dor bai kit mar thymmai kaba la pynbna da ka sorkar Jylla lyngba ka tnad Transport.

Ki nongialam ka JAC ba kynthup ia u Nidamon Chulet, Balen Thubru, Stephan Ranglong na ka MTU kila hiar sha ki kharkhana dewbilat haka sngi Nyngkong da ka jingthmu ban leit pynbeit iaka dor bai ki mar thymmai ba kynthup iaka dewbilat bad clinker, pynban ki nongpyniaid ki kharkhana dewbilat kila kyntait mardor ban pyntreikam iaka jingpynbna haka 13 tarik Kyllalyngkot 2020 lyngba u Commissioner bad Secretary sha ka sorkar Jylla, Transport Department.

Hadien ba kine ka synjuk jong ki nongpyniaid iaki kharkhana dewbilat kila kyntait ban pyntreikam ia kane ka dor thymmai, ka JAC kala rai ban sangeh kit mar khlem buh por tad haduh ba kine ki kharkhana kin pyntreikam iaka dor kaba la buh thymmai ka sorkar.

Shuwa ban shim ia kane ka rai ban sangeh kit mar kiba ki kharkhnaa dewbilat, ka JAC kala iakynduh shuwa ia u president bad secretary Jaintia Hills Cement Manufacturer Association (JHCMA) u RK Pareek bad u Pawan Joshi.

Kane ka jingialang kala long kaba khluit tar hadien ba kine nongialam ka JHCMA ki kyntait ban pdiang ban pyntreikam iaka jingpynbna jong k sorkar bad kila pan por na ka JAC haduh 30 tarik une u bnai.

“Ngi la aipor bad phah ki shithi, hynrei kine ki kharkhana ki leh bymsuidniew iaka jingdawa jong ngi ki nongkit nongbah,” la ong u Nidamon bad bynrap ba lada kim pyntreikam iaka jingpynbna ka sorkar kin sangeh ban kit mar khlem buh por tad haduh ba kila ioh iaka jingdawa.

“Ngi la pan por haduh 30 tarik u Jylliew ban peit iaka jingpynbna ka sorkar la ka treikam ne em haki kharkhana shimet bad haduh mynta ngim shym la ioh iaka jingbthah na ka sorkar ban pyntreikam ia kane ka dor bai kit thymmai,” ong u PK Pareek.

Hadien bym seisoh ka jingiakren ka JAC bad ki nongialam JHCMA ha Topcem, kila hiar sh ka kharkhana dewbilat ka Star Cement, hynrei tang marsien poi haka khyrdop kane ka kharkhna la wan poi shi pyrton ki shipai CRPF bad ki Pulit bad ym shah iaki nongialam ka JAC ban iakynduh iaki transporter bar jylla shapoh kharkhana.

Hadien la wan u Divender Bansal, Residents Director Star Cement ban iakynduh iaki nongialam JAC, hynrei kane ka jingiakren hapdeng kine ki arliang mamla ruh kam poi shaei shaei.

“Baroh shi katta ngim ju ioh ka dor kaba thikna ban kit ban bah mar na ki kharkhna dewbilat, hynrei mynta da ka jingpynbeit thymmai ka sorkar lyngba ka tnad Transport iaka dor bai kali ha kaban kit ban bah kala ai mynsiem ia ngi,” la ong u Nidamon Chulet bad bynrap mynta pat kine ki kharkhana kila pyni bor shaba palat bad kim kwah ban kyntiew dor sha 9 tyngka haka shi kilometre shiton haka surok rong, T.10 shi ton haka ki surok maw bad haka surok khohruh khohram T.12 shi ton.