Pyni ia ka phlim Onaatah ha Laitkroh Block khlem da ioh jingbit, maham ia kiba leh beaiñ

Syllad | The Rising MeghalayaOctober 19, 2024

Ka long kaei kaei kaba sngew lyngngoh ban tip ba ki don katto katne ki briew kiba la pyni paidbah ia ka phlim Onaatah hynnin ka sngi ka 18 tarik u Risaw ha ophis jong ka Laitkroh Block khlem da ioh jingbit na ki nongpynmih ne ki nongshna kane ka phlim.

Kane ka jingleh jong kine ki briew ne la ki dei na kano kano ka kynhun ruh ban pyni ia kane ka phlim khlem da ioh shwa ia ka jingbit na ki nongshna ne ki nongpynmih ia kane ka phlim ka long kum ka jingbym burom ia ki bad kumjuh ruh ka long kumba tuh im im peit peit ia ka umsyep jong ki puron ki tyngshop bad baroh kiba la trei shitom ban pynmih ia kane ka phlim khamtam eh ba kane ka phlim ka la wan rah ruh ia ka nam ia ka Jylla da kaba ka la ioh ia ka khusnam National Award ha u snem 2016.

Haba iakren bad u Director kane ka phlim u Bah Pradip Kurbah u la pynpaw ia ka jingsngew lyngngoh ba ka don kum kata ka jingpyni ia ka phlim jong u ha ophis jong ka Laitkroh Block namar u la iathuh ruh ba ym shim la don mano mano ruh ban pan jingbit halor ka jingpyni ia kane ka phlim ha kane ka shlem treikam jong ka Laitkroh Block.

Shuh shuh u Bah Kurbah u la bynrap ruh ba lada dei ba tang ba ki pan jingbit shwa bad pyntip ruh ia kaei ka daw ba ki kwah ban pyni paidbah ia kane ka phlim, lehse ka lah ban long da kumwei bad u la ong ruh ba u long uba kloi ban pyni ia ki phlim jong u lada ki wan ha ka lynti kaba dei bad wat ban ia synnianglang ha ino ino i bynta lada ki kwah ban pyni ia ki phlim ki jong u na ki bynta ki daw kiba bha.

Une u rangbah u la bynrap ruh ba kane ka jingleh jong kine ki briew ka long ka bym sngewtynnad bad kaba pyni ruh ia ka jingbym khein snep bad burom ia ki kam jong ki nongshim bynta lem bad ki nongshna bad ki nongpynmih ia kane ka phlim.

Na ka liang u Bah Merlvin Mukhim uba dei u tyngshop pdeng jong kane ka phlim u la pynpaw ba ym tang ba u sngew kyndit hynrei u la pynpaw ruh ia ka jingsngewsih ban tip ba la pyni paidbah ia ka phlim Onaatah ha Block Office kaba don ha ka shnong Laitkroh khlem ka jingpan jingbit lane kynjoh ktien na ki nongshna bad nongpynmih ia ka.

Shuh shuh u Bah Merlvin u la ong ruh ba shimet kum u tyngshop ba ia don bynta ha ki phlim Khasi u sngew ba kane ka jingleh ka dei ban pynrem jur namar ka long kaei kaei kaba bakla. “Nga sngewthuh bad tip ba ki bun ki briew kylleng ka Jylla kiba sngewtynnad ban peit ia ki phlim Khasi, khamtam ki phlim ba shna da u Bah Pradip Kurbah, hynrei ka don ka rukom kat kum ki ain ki kyndon (The Cinematograph (Amendment) Act, 2023 bad ka Copyright Act, 1957) ban ioh ban pyni bad peit ia ki. Nga kyrmen ba kum kine ki jingleh beain leh biej kan ym jia shuh nangne shakhmat,” la bynrap shuh shuh une u tyngshop.

Haba iakren bad uwei na ki dkhot jong ka Fraternity Art Cine Entertainment Shillong (FACES) u Bah Elmer R War, une u rangbah u la pynrem jur ia ka jingleh jong kine ki briew kiba pyni khlem ioh jingbit ia ka phlim Onaatah ha Laitkroh Block bad u la buh jingkylli ruh ia ki ba kumno kin sngew lada ma ki ki shah knieh jubor ia ka umsyep ka jong ki kaba ki la trei shitom ban ioh ia ka.

Shuh shuh u Bah War u la pynrem ruh ia kane ka jinglong jong ki katto katne ki briew ba ki nud ban leh ia kane ka kam bad u la pynkynmaw ruh ba ki don ki don ki briew kiba kwah tang ban ioh jingmyntoi shimet khlem da trei shitom ki la nud wat ban knieh jubor ia ka umsyep jong kiwei namar ki don ki briew kiba la nud ban thep ia ki phlim khasi bad pnar ha youtube channel jong ki khlem da don ka jingsngew ia kaei kaba ki leh bad u la pynpaw ia kane, na ka jinglap ka jong u hi ha ki katto katne ki youtube channel kiba la nud ban thep ia ki phlim khasi bad pnar, kum ka phlim Ka Thong Iong Nga jong ka Kong Simi Khongthiang, ka phlim Nabon ba la pynmih da ka Jingiaseng Samla KJP Synod Sepngi lem bad kiwei kiwei.

Ha kajuh ka por ka Fraternity Art Cine Entertainment Shillong ka la maham tyngeh ia kine ki riew shim kabu ba lada ki bteng ban leh ia kine ki kam beaiñ, na ka liang ka kynhun kan sa iaid lyngba ka aiñ bad kan dawa ruh ia bai mynraiñ khmat na kine ki riew shim kabu.