Pyni ka JHTOA da ka kam pynphai lut iaki trok dewbilat haka sngi ba sdang ka jingiakhih dawa bai kit thymmai

Syllad | The Rising MeghalayaDecember 6, 2021

Ka Jaintia Hills Truck Owner’s Association (JHTOA) kala sdang iaka jingiakhih kaba khlem buh por bad pyni syndon da ka kam da kaba pynphai lut ia baroh ki trok jong ki karkhana kit dewbilat bad clinker ha Tuber Takhniang, East Jaintia Hills District haka sngi Nyngkong.

Ka jingiakhih ka JHTOA kalong pyrshah iaki karkhana dewbilat ha rilum Jaintia hapoh ka lama jong ka Jaintia Hills Cement Manufacturing Association (JHCMA) ka bym shym la pyntreikam iaka dor bai kit bai bah cement kaba la mynjur da ki lai liang mamla ka JHCMA, JHTOA bad ka sorkar naduh mynshem snem 25 tarik Nailur 2020, kata ban pynhiar iaka dor na ka 9 tyngka shi metric ton shi kilometre sha ka 7 tyngka.

Ka JHTOA bad ka JHCMA kala iakren na ka por shaka por ban pynbeit ia kane ka kam, phewse ki karkhana dewbilat kila iuhroit iaka hok ki trai trok trai jylla da kaba thied iaki trok ban kit hi iaki mar kiba mih na ki karkhana.

Kane ka jingïakhih ka JHTOA kala sdang hadien bala kut ka jingai por naduh 1 tarik mynta u bnai ïaki trai jong ki karkhana pynmih dewbilat ban pyntreikam ïaka bai kit bai bah ba thymmai.

Ki dkhot jong ka JTHOA ki la lum paidbah ha Tiuber Takhniang, Tuberkmaishnong naduh mynstep haka jingïalam u President u Nidamon Chullet bad ki la pynsangeh bad pynphai lut ïaki trok kit dewbilat bad clinker bad phah leit phai biang ïaki sha ki karkhana kaba ki wan na Lumshnong bad kiwei kiwei ki jaka.

Ka JTHOA ka la dawa ïaka jingpyntreikam ïaka bai kit bai bah kaba thymmai kaba long 7 tyngka shi kilometre shiton kaba duna haduh 2 tyngka shi kilometre shiton na ka jingpynbna ka sorkar lyngba ka tnad Transport.

Ha kane ka sngi ka la don ruh ka jingïalang lyngkot ha kaba la rai ban nang pynjur shuh shuh ïaka jingïakhih kaba khlem buh por lada ki karkhana dewbilat kim pyntreikam satia ïa katei ka dor.

“Ngi la dawa ba ki karkhana kidei ban pyntrei ïa kane ka rai jong ka sorkar jylla ban kyntiew ïaka bai kali, hynrei kitei ki company kim shym la sngap ïa ngi”, la ong u President u Nidamon Chullet.

Halor kane ka jingiakhih ka JHTOA ka East Jaintia National Council (EJNC) kala ai ka jingkyrshan kaba pura iaka JHTOA.

Nakaliang ka EJNC ka ai ka jingkyrshan kaba pura iaka jing iakhih jong ka JHTOA ka bala sdang naduh mynta ka sngi bad dawa iaka sorkar jylla ban tuklar halor ka dor bai kit thymmai kaba T.7 shi metric ton shi kilometre. Ka EJNC ka dawa ruh na ka JHCMA baka dei ban pyntrei kam noh ia katei ka dor bai kit thymmai kumba la pynbeit ki lai liang mamla kaba la sahteng naduh mynshem snem.