Pyni nam ka Horticulture iaki mar rep bad ki syntiew ki skud ha Jowai

Syllad | The Rising MeghalayaFebruary 11, 2021

Ka ophis jong ka District Horticulture Officer, West Jaintia Hills District haka sngi Palei kala pynlong ia ka jingiakop pyninam iaki jingthung jingtep bapher bapher kaba la wan ban iashimbynta da ki nongrep naki lai tylli block hapoh ka district.

Ia kane ka jingpyninam la pynlong ha madan Marian Hill Higher Secondary School, Jowai, ha kaba ka Director of Horticulture, Meghalaya Shillong ka kong S Nongbet kala long kum ka kongsan.

Ki nongrep kila wanrah iaki jhur ki jhep, ki syntiew ki skud, ki soh ki pai, u shyrmit u sying kumjuh ruh la pyni iaka ka rukom pynmih ia ka umngap bad kaba pynkha pylleng syiar bad kiwei.

Ka Director of Horticulture ka Kong S Nongbet, haba kren kala ai ka jingiaroh iaka District Horticulture Officer kaba la lah ban pyniaid shakhmat ia kane ka jingpyninam wat hapdeng ka khlam ka ngooh bad ka jingsangeh kali kali ki synjuk bapher bapher.

“Mynta ka sorkar ka don ar tylli ki scheme kiba heh na ka bynta kane ka District ba kynthup iaka jingrep shynrai bad sying hapoh kane ka District. Ki nongrep ki dei ban shimkabu iaki lad jingiarap jong ka sorkar khnang ban myntoi haka ioh ka kot ban kyntiew iaka kam rep,” la ong ka Director.

Kiba kren ki kynthup iaka DHO, West Jaintia Hills Kong RK Blah, ma D Pyrbot, DAO Officer nalor kiwei kiwei ki ophisar ka tnad Hortuiculture haka jingialang la pyniaid da ka kong L. Lakiang Project Director ATMA.

Ha kane ka jingpyni nam la sam ruh iaki khusnam sha ki nongrep.