Pyni nam ka ophis Horticulture iaki mar rep ha Jowai

Syllad | The Rising MeghalayaNovember 22, 2023

Ka ophis District Horticulture Officer, West Jaintia Hills haka 22 tarik Naiwieng ka la pynlong da ka rynsan pyni nam kaba tip kum ka ‘Horticulture Exhibition’ kaba hap hapoh ka Mission for Integrated Development of Horticulture (MIDH) 2022-2023 ha madan Marian Hill Higher Secondary School, Jowai haka sngi Balang.

Ki nongrep na kylleng ki shnong jong ka District ki la wanrah iaki mar rep bapher bapher ba la bynta hala ki jong ki jong ki kyrdan jong ki mar rep ba kynthup naduh ki jhur ki jhep, ki sah ki pai, ki syntiew ki skud bad kiwei kiwei ki mar rep.

U District Horticulture Officer, West Jaintia Hills u Bah S Rani ula ong, ka jingthmu jong kane Exhibition ka long shibynta ka jingiakynduh lang jong ki nongrep bad ban iaphylliew jingmut para nongrep khnang ban tip shuh shuh iaki lad ki kabu kumno ban pynbha shuh shuh iaka kam rep.

U MLA ka Jowai u Ma Wailadmiki Shylla uba long ruh u Chairman ka Meghalaya Urban Development Authority (MUDA) kum u kongsan haka jingkren ula ong ka Jylla Meghalaya haduh kine ki sngi ka dang shaniah na kiwei ki Jylla kynthup naduh ka bam ka dih bad kiwei kiwei ki jingdonkam.

Ula ong kumba long mynta ki don ki nongrep kiba long nongrep tang kat ban ioh skhim sorkar, hynrei ki khlem wad ki lad ki lynti kumno ban pynheh pyniar iaka rep ka riang ka jong ki. Kumta ula kyntu iaki nongrep ban pynheh pyniar iaka kam rep bad ban shim ruh iaka kam rep kum kata ka lad kamai ka ban kyntiew iaka ioh ka kot jong ki bad ka jylla.

Nalorkata ula ong don ki kmie ki kpa kiba don iaki khun kiba la nang la stad, hynrei kim ju pynshlur iaki haka kam rep. Ha kane ka juk kyrduh kam ula kyntu iaki kmie ki kpa ban hikai bad ailad iaki khun ban shim iaka kam rep kum kawei na ki kam kaba ki lah ban ieng ha la ki kjat lajong khlem da khmih lynti ne shaniah tang haki kam sorkar.

Ka Kong DC Sohtun MAS Director of Horticulture, Meghalaya Shillong ka la kyntu iaki paid nongrep ba lada kino kino ki jingeh haka liang ka rep ka riang kim dei ban lehrain ban leit pan jingpynshai na ki ophis sorkar bad ha kajuh ka por ka kyntu ban shim kabu iaki skhim sorkar bapher bapher ki ban pynmyntoi bad kyntiew iaka ioh ka kot ka jong ki.

Kiwei de kiba la ai jingkren ki long ka Kong DV Lyngdoh, ADC West Jaintia Hills District, u R. Lamare Assistant Director of Horticulture West Jaintia Hills District, u Foster Kharsohnoh Progressive Farmers West Jaintia Hills District, u Mutshwa Thabah Vice Chairman EARMACS haka jingialang kaba la pyniaid da ka Kong Risakaru Lyngdoh SMS (Agronomy) bad u Mebanphikir Kharbuli Farm Manager KVK.

Ha kane ka sngi la sam ruh iaki khusnam sha ki nongjop.