Pyni u paid Khanduli da ka kam, jynrat iaka signboard khrong khajna ka Karbi Anglong Autonomous Council

Syllad | The Rising MeghalayaApril 17, 2023

Ki paidbah ka shnong Khanduli kiba la khie bitar iaka jingwan sieh signboard ka Karbi Anglong Autonomous Council (KAAC), Assam kaba la thoh shai bha -Khanduli Entry Tax kila hiar ban jynrat ia kane ka signboard haka sngi Nyngkong.

Ha kane ka jingjynrat ia katei ka signboard la sakhi ba baroh ar liang ki bor synshar district jong ka West Jaintia hills District bad ka West Karbi Anglong District kila don ha katei ka jaka.

U paidbah nongshong shnong Khanduli kila jynrat ia kane ka signboard bad ki pulit na baroh ar district, kata ka West Jaintia Hills bad West Karbi Anglong kila shu kylla long nongpeitkai.

Kane ka jingjynrat ki paidbah ia kane ka signboard kala jia haka por kumba 3 baje eiei bad kala mih ka thma ktien kaba jur na baroh arliang bad ia kam trai iaka jaka.

U Waheh shnong ka Khanduli u Yooshida Nongspung ula ïathuh ba ka Karbi Anglong Autonomous Council (KAAC) kala siej jubor ïaka signboard hapoh u pud u sam jong ka shnong Khanduli na bynta ban khrong khajna ïaki kali kit mar rep jong ki nongshong shnong ka Khanduli.

Ula ïathuh ba ïa katei ka signboard la antad ba ka KAAC la wan sieh haka miet 15 tarik une u bnai.

Shuh shuh na kaliang ki nongshong shnong ka West Karbi Anglong, Assam pat kila bein ia ki Pulit ka Assam ba ki nang tang ban khrong khajna, hynrei kim lah satia ban iada ia u pud u sam wat hadien ba la pynpra ia ki mar sorkar.

Ha kawei ka khubor, ki dkhot jong ka Khasi Students’ Union haka sngi Nyngkong kala hiar sha ka shnong Moojem ka shnong kaba hap haka jingiakhajia pud ha Block I ban khanglad iaka jingkynnoh kyntur pud ki nong Karbi na Moothade sha ka ki jaka jong ki jaid bynriew Khasi Pnar ha Moojem.

U General Secretary KSU west Jaintia hills u Leningrad Tariang ula ong ba kila ioh jngtip na ki nongshong shnong ka Moojem ba kadon ka jingthmu kyntur pud ki nong Karbi ha ki jaka kiba dei trai da ki paid Khasi Pnar. Ula ong ba la pynbeit iaka jingialang ha kawei ka sngi ban pynbeit ia kane ka jingkyntu pud ki Karbi ha ki jaka rep jong ki paid Khasi Pnar.

Katba ka Hynniewtrep Border Dispute Redressal Forum haka jingialam u Chandame Sungoh ha ryngkat ka jingsynran jong u Secretary Shnong ka Shnong Moojem u N. Sten ki la leit ai syndon da ka dorkhat haka kti u Deputy Commissioner u Bah B Sohliya IAS halor kane ka jingkyntur pud ki nong Karbi ha Moojem.

Halor kane ka jingiakynad na ka jingiaknieh jaka, u Chairman ka HBDRF ula ïathuh ba naka liang u Deputy Commissioner ula phah ïa u BDO uba dei Border Magistrate bad ka kynhun pulit sha katei ka jaka bad ula ïathuh ruh na ka liang u DC ula phah ïakynduh ïaka Deputy Commissioner bad Superintendent of Police jong ka West Karbi Anglong haka 19 tarik une u bnai ha nongbah Jowai ban ïakren halor kane ka kam.