Pyniasoh BJP ka DHS barim ka jylla ka Dr. Rita Tariang 

Syllad | The Rising MeghalayaDecember 29, 2023

Ka DHS barim ka sorkar jylla ka Dr. Rita Tariang kala pyniasoh ialade sha ka seng BJP Meghalaya ha kaba la pdiang sngewbha ia ka da u president ka party ka jylla u Rickman Momin ha ka jingiadon lang ki Vice President kiba kynthup ia u Bah Khrawboklang Basaiawmoit, u Gagan Jain bad u Bah Wankitbok Pohshna, General Secretary u Bah Everist Myrsing bad ka State Secretary ka Dr. Bernadette Lyngdoh bad kiwei kiwei.

Haba aijingkren ha ka jingialang, u Rickman Momin u la ong, “Ka Dr. Tariang kadei kaba la don ia bun ki jingnang jingtip ha kaban pyniaid ia ki kam ki jam bad ka jingtrei shitom ka jong ka ban pyniar ia ka jingai jingsumar na ka bynta kito kiba donkam ia ka jingsumar kadei kaei kaei kaba baroh ki la ia tip bha.”

Nalor kata u la ong ruh, “Ka party kan ioh shibun ki jingmyntoi lyngba kane ka jingtbit ka jong ka bad ki jingnang jingtip ba jylliew jong ka kin iarap ia ngi ban ai ka jingshakri kaba bha tam sha ki paidbah nongshong shnong ka jylla Meghalaya.”

Halor kaei ka daw kaba la pynlong ia ka ba kan shim ia ka rai ban leit pyniasoh sha ka BJP, ka Dr. Tariang ka la ong; “Nga la sngewthuh shai ba dei tang kane ka party kaba iai trei khlem shongthait na ka bynta ban kyntiew ia ka bha ka miat jong ki duk ki suk bad ki rangli ki juki, kata kumba la sakhi halor ka jingpyntreikam ia ki skhim bapher bapher ban kyntiew ia ka koit ka khiah ia kiba la wanrah da ka sorkar pdeng lyngba u Myntri Rangbahduh ka ri u Narendra Modi.”

Shuh shuh ka la ong ruh ba ka BJP ka la tyrwa ha ka ia ka rynsan ha kaba kan lah ban bteng ban ai ka jingshakri ia ki paid nongshong shnong ka jylla wat hadien ba ka la shongthait na ka kam.