Pynïasoh BJP u Bah Melam Rangad

Syllad | The Rising MeghalayaFebruary 2, 2024

U Bah Melam Rangad na Laban u lah leit ban pynïasoh ïalade bad ka seng BJP bad kane kala nangpynkhlaiñ ïa kane ka seng saiñ pyrthei ha kane ka jylla. La pdiang sngewbha da u nongaiktien ka party u Bah Mariahom Kharkrang haka jingiadonlang u ophisar IFS barim u Bah  Gregory Shullai

U Bah Melam u dei uba lah pyndep ïa ka kyrdan pule jong ka Master ha Tourism, ka jingwan jong u sha kane ka seng ka pyni dak halor ka jinglah ban khring ïa kiba bun ki samla sha kane ka seng ha kane ka jylla.

U briew uba don ka lypa ka mynsiem ïarap, u Bah Melam Rangad u dei uba bat ïa ka kam  secretary jong ka  Thranghok Rangad Academic Society ka seng kaba ju don bynta ban ai jingīarap bad kyrshan ïa ki khynnah pule kiba wan na ka longïing ba duna ka ïoh ka kot bad u dei ruh u briew uba lah bna nam halor ka jingnoh synñiang na ka bynta ka bha ka miat jong ka imlang ka sahlang.

Ha ka jingkren ha kane ka sngi pdiang burom u Bah Mariahom Kharkrang u lah ong, “U Bah Melam Rangad u dei u pyrsa ksiew jong u Bah Thrangbok Rangad, u Rangbah ba ka seng BJP ka jylla ka ïai kynmaw bad pyrto junom. Nga lah don ka jingïadei kaba lah slem bad ka don ka jingsngewjan bad kmen hapdeng ka jingpdiang burom ïa u Bah Melam ha ka skum jong ka BJP”.

Ha ka jingkren ha katei ka sngi u Bah Melam Rangad u lah ong, “ka dei ka jingpyrsad mynsiem jong u kñi tymmen ïangi baroh bad nga dap da ka jingsngewsarong kaba khraw ba nga lah ban bud ïa ka dienjat jong u. Na ka bynta jongnga nga sngew kum ka jingwanphai sha lah ïing lajong bad nga aiti ban ïarap ïa ka seng BJP Meghalaya ba kan lah ban kynjoh kham sha kynjang”.

Haba kylli halor ka jingieid jong u ïa kane ka seng BJP ban ïa kiwei pat u Rangad u lah jubab da kaba ong, “Mano bym don jingkyrmen  hapdeng ka khubor ba lah pynpaw da u Myntri Rangbah duh ka Ri ban kyntiew ïa ka imlang ka sahlang? Mano bym ïoh mynsiem halor ki skhim bapher bapher jong ka sorkar pdeng ba lamkhmat da ka BJP,  kaba lah mang ban kyntiew ïa ka kawei jongngi baroh. Ka BJP ka dei kaba plielad ïa ka rynsan kaba paka tam na ka bynta jongnga ban shakri ïa ka imlang ka sahlang, ka jylla bad ïa ka ri ho baroh kawei.”