Pyniasoh NPP ki nongialam bad dkhot ka UDP ba iehnoh kam dangshen na Ri Bhoi

Syllad | The Rising MeghalayaMarch 23, 2024

Ki dkhot bad nongialam ka United Democratic Party (UDP), Ri Bhoi District Unit kiba la iehnoh kam dangshen kila pyniasoh noh ialade sha ka party National People’s Party (NPP) haka 22 tarik Lber haka jingialang ialap elekshon ka kong Ampareen Lyngdoh.

Kane ka jingialang ialap elekshon ka Kong Ampareen kala long ha Sajer, Nongpoh bad haka juh ka por la pdiang iaka MDC barim Nongpoh bad ka nongialam ka party Congress ka Kong Rona Khymdeit, Working President ka UDP state level bad President ka Ri Bhoi District u Bah Donbok Khymdeit nalor kiwei kiwei.

Haba kren ha kane ka sngi, ka Kong Ampareen Lyngdoh ka la pynpaw ia ka jingsngew kmen kaba khraw halor ka jingwan pyniasoh ki nongialam ka party UDP bad Congress sha ka iing ka sem jong ka NPP.

Ka la ong ruh, ba kum ka kyrtong MP na ka NPP ka don shisha ia ka thong ban leit tied ia ka jingkhang bah ha New Delhi na ka bynta ki jingkylla jong ka jylla bad ki nongshong shnong jong ki 60 tylli ki Constituency jong ka Shillong Parliamentary Seat, da kaba bynrap ruh, ba ngan long kum kmie bad MLA na bynta baroh kine ki Konstituensi ba kan btin lynti sha ka jingbha bad jing nang kiew ha baroh ki liang.

U Bah Prestone Tynsong hadien ba la pdiang burom ia ki nongialam ka party Congress bad UDP, u la ai jingiaroh ia kine ki nongialam kiba la rai ban kylla noh ki nongialam ba radbah jong ka NPP kaba dei ka party kaba don ha syndah u paidbah ka jylla Meghalaya ym kum kiwei ki party kiba mlien tangban hylla ha madan madiah bad ban pyrta ieid jaidbynriew tang ha ka tyngam ym ha ka kam.

Ula ong ba ka donkam kyrkieh ban phah iaka MP ban tynruh haka sorkar pdeng ba kan long kum ki pipe um ba heh ha ryngkat ka tanky kaba heh ban sam umbam umdih bad ban wanrah jingkyrkhu ia ka jylla hi baroh kawei.

Ha kane ka jingpdiang burom la iadonlang National Vice President bad State President ka NPP u Bah Prestone Tynsong, ha ka jingiadonlang ruh ka kyrtong MP ka Dr. Mazel Ampareen Lyngdoh, u National General Secretary u Ma Sniawbhalang Dhar, ar ngut ki MLA ka NPP ba kynthup ia u Bah Sosthenes Sohtun bad u Bah Damanbait Lamare, kiwei pat ki nongialam ka NPP u Bah Himalaya M Shangpliang lem bad kiwei kiwei ki heh ka party NPP.