Pyniasoh u MDC ka BJP bad lai ngut ki kyrtong MLA sha ka seng NPP ha West Jaintia Hills

Syllad | The Rising MeghalayaApril 1, 2024

Katba nang iaid ki sngi ki por ka Seng National People Party (NPP) ka la nang iohbor ka la nang khlain ha ka jylla Meghalaya bad mynta ka kynti ka dei ha West Jaintia Hills District haba u wei u MDC jong seng Bharatiya Janta Party (BJP) bad lai ki kyrtong jong ki artylli ki seng sain hima sima ki la pyniasoh noh sha ka seng NPP kaba long ka seng sain hima sima kaba nyngkong duh na thain shatei lam mihngi ban ioh ia ka kyrdan National Party.

Katkum ki jingiathuh jong ki nongialam jong ka seng NPP, u MDC jong ka BJP na ka Sumer u Ma Krison Langstang, u kyrtong jong ka seng Indian National Congress na Mowkaiaw Constituency u Ma Nehemayah Tyngkan, u kyrtong jong ka seng Indian National Congress na Jowai Constituency u Ma Daniel Dann bad u kyrtong jong ka seng Trinamool Congress u Ma Lasting Suchiang ki la dep pyniasoh ialade ha kine ki sngi kiba ladep.

Ka party ka la khot pynlong ia ka jingialang ba kyrpang ha ka sngi Ba Ar mynta ka taiew ha Indoor Hall jong ka Shnong Ladthadlaboh, Jowai ha ka por 10 baje mynstep ban pdiang sngewbha bad pynkup burom ia kitei ki saw ngut nongialam seng sain sima hima sha ka party kaba dang iakhun ia ka eleshon Lok Sabha kaba nyngkong eh naduh bala seng ia ka ha u snem 2012 da u Speaker barim jong ka Lok Sabha u Purno A Sangma.

Ha katei ka jingialang, yn donlang u National President jong ka Party bad uba long ruh u Chief Minister ka Jylla u Conrad K Sangma, u National General Secretary jong ka Party bad uba long ruh u Deputy Chief Minister jong ka Meghalaya u Ma Sniawbhalang Dhar bad u President jong NPP Meghalaya bad u Deputy Chief Minister u Ma Prestone Tynsong nalor kiwei kiwei de ki nongialam party.