Pynithuh iaka kyrteng kiba bit khlam COVID-19 ong ka JSU

Syllad | The Rising MeghalayaJuly 13, 2020

Namar ka jingsar ka khlam COVID-19 haka Jylla kaba la kynjoh palat 300 ngut kynthup ia ki 2 ngut kiba la khlad, ka Jaintia Students’ Union (JSU) Shillong circle kala dawa ban pynbna iaka kyrteng jong kiba bit khlam COVID.

“Ka sorkar ka dei ban iathuh shai ia ki kyrteng kiba ioh COVID 19 ban suk ban lap ia kiba lah kynduh iaki. Ka jingiathuh ia ka kyrteng kiba ioh COVID 19 kan iarap ban iada na ka jingsaphriang bad pur sted ka khlam COVID 19 hapoh shnong hapoh thaw namar kan pynsuk ban lap ia kiwei kiba lah ia kynduh bad u/ka ba bit khlam,” ong u kyrwoh bala phah ka JSU.

Ka jingiakhun iaka khlam kam dei shu tang ka mat kaba dei ban peit ka sorkar, hynrei u paidbah u don ka juh ka jingkitkhlieh bad ka sorkar ka dei ban pynbna iaka kyrteng kiba ioh kem pang.

Ka JSU kala ong shuh shuh ban pynsuk ban wad ia kiba leit sha ka jingiathoh shongkurim ha Greenwood Resort ka dei ban pan iaki dur ki dar bad ki video ba la ring haka jingkyntiew kurim ban ithuh iaki briew bad ban iada na ka jingpur ka khlam.

Ka JSU kala ong shuh shuh ba ha kaba iadei bad ki shipai kynthup iaki BSF ka sorkar ka dei ban pyrkhing iaka wan ka leit ki shipai ha baroh ka Jylla namar kumba long mynta kila long kum ki nongwanrah ia kane ka khlam bad ban buh iaki jaka test ha kylleng ki khappud ka Jylla bad ki jaka treikam jong ki bad ban pynbiang iaki lad jingsumar ha ki jaka sah jong ki.

Ka JSU kala kyntu iaka sorkar ban snagp iaka sur u paidbah khnang ban lah ha kaban tem bad pyndkut iaka kynjri jingpur ka khlam COVID 19.